දෙහිවල ප්‍රදේශයේ ව්‍යාපාරිකයෙකු විසින් ඔහුට අයත් මාලිගාවත්ත, ජුම්මා මස්ජිත් පාරේ පිහිටි මෝටර් රථ අමතර කොටස් ගබඩාවක් තුල මුදල් බෙදී දීමට ගොස් ඇතිවූ තෙරපිමකින් කාන්තාවන් තිදෙනෙකු මරණයට පත්වී තිබෙනවා.
තමාගේ ව්‍යාපාරික ස්ථානයට යෑමට සඳහා යැයි පවසමින් දෙහිවල පොලීසියෙන් ඇදීරිනිති බලපත්‍රයක් ලබාගෙන ඇති ව්‍යාපාරිකයා තවත් පුද්ගලයන් හතර දෙනෙකු සමග අද (21)උදෑසන මාලිගාවත්ත ප්‍රදේශයට පැමිණ දහවල් කාලයේදී ජනතාව ඒක රාශි කරවාගෙන රාමදාන් හේතුවෙන් මුදල් බෙදා දීමක් සංවිධානය කර ඇති බව ජේෂ්ඨ නියෝජ්‍ය පොලිස් පති දේශබන්දු තෙන්නකෝන් මහතා සඳහන් කර සිටියා.
පුද්ගලයන් 400 -500 ක් අතර ප්‍රමාණයක් මේ සඳහා පැමිණ ඇති බවත් ඒ අවස්ථාවේ ඇතිවූ තෙරපීමෙන් කාන්තාවන් තුන් දෙනෙකු දැනට මියගොස් තවත් 8 දෙනෙකු තුවල ලබා ඇති බවත් ජේෂ්ඨ නියෝජ්‍ය පොලිස්පතිවරයා වැඩිදුරටත් සඳහන් කර සිටියා.
දැඩි නොසැලකිලිමත් ක්‍රියාවක් සංවිධානය කිරීම, පොලිසියට නොදන්වා ඇඳිරිනීතිය පවතින කාලයක පිරිසක් ඒක රාශි කිරීම, කොරෝනා වෛරසය ව්‍යාප්ත කිරීම සඳහා පුද්ගලයන් අතර පරතරය පවත්වා නොගැනීම යන චෝදනා යටතේ ප්‍රධාන ව්‍යාපාරිකයා ඇතුළු ඔහුගේ සහයකයින් 6 දෙනෙකු අත්අඩංගුවට ගෙන මාලිගාවත්ත පොලිසියට යොමු කර ඇති බවත් ඔවුන්ට විරුද්ධව අධිකරණ ක්‍රියාමාර්ග ගන්නා බවත් දේශබන්දු තෙන්නකෝන් මහතා සඳහන් කර සිටියා.