අත්‍යවශ්‍ය භාණ්ඩ ප්‍රවාහන සඳහා නිකුත් කළ බලපත්‍රයක් යොදා ගනිමින් හෙරොයින් ප්‍රවාහනය කළ පුද්ගලයින් දෙදෙනෙකු මැදිරිගිරිය ප්‍රදේශයේදී අත්අඩංගුවට ගෙන තිබේ.
පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා සඳහන් කළේ, කැබ් රථය නාරාහේන්පිටට පැමිණ මැදිරිගිරියට යන අවස්ථාවේදී මැදිරිගිරිය පොලීසිය විසින් අත්අඩංගුවට ගනු ලැබ ඇති බවයි.
අත්අඩංගුවට ගන්නා අවස්ථාවේ ඔවුන් සතුව තිබූ හෙරොයින් ග්‍රෑම් 3 ක් පොලීසිය භාරයට ගෙන තිබේ.
පොලිස් මාධ්‍ය ප්‍රකාශකවරයා පැවසුවේ, කොළඹ මැනිං පොළේ සිට එළවළු ප්‍රවාහනය කිරීම සඳහා යැයි පවසමින් මොවුන් මැදිරිගිය ප්‍රාදේශීය ලේකම්වරයාගෙන් එම බලපත්‍රය ලබා ගෙන ඇති බවයි.
මොවුන් මීට පෙර ද මෙලෙස හෙරොයින් ප්‍රවාහනය කර ඇති බවත් අද අධිකරණයට ඉදිරිපත් කර රඳවා තබා ගෙන ප්‍රශ්න කිරීමේ නියෝගයක් ලබා ගැනීමට නියමිත බව ත් පොලිස් මාධ්‍ය ප්‍රකාශකවරයා පැවසී ය.