පසුගිය මාර්තු 29 වැනිදා සිදුවූ මහ බැංකු බැඳුම්කර වෙන්දේසියේදී අධික පොලියට රු. කෝටි 2900 ක බැඳුම්කර ලංසු පිළිගැනීම නිසා රජයට රු. කෝටි 200 කට අධික පාඩුවක්‌ සිදුව ඇතැයි මූල්‍ය වෙළෙඳපොළ නියෝජිතයෝ පවසති.
මෙම බැඳුම්කර වෙන්දේසියේදී ශ්‍රී ලංකා මහ බැංකුව විසින් රු. බිලියන 10 ක භාණ්‌ඩාගාර බැඳුම්කර නිකුත් කරන බව ප්‍රසිද්ධ කොට ඒ ප්‍රමාණය මෙන් තුන් ගුණයක එනම් රු. බිලියන 29 ක භාණ්‌ඩාගාර බැඳුම්කර සියයට 14.23 ක අධික පොළියට නිකුත් කර ඇත.
මෙසේ මුලින් ප්‍රසිද්ධ කළ බැඳුම්කර වටිනාකම ඉක්‌මවා අධික පොලියට භාණ්‌ඩාගාර බැඳුම්කර නිකුත් කිරීමෙන් රජයේ පොලී වියදම විශාල වශයෙන් ඉහළ යැම නිසා මේ අතිවිශාල පාඩුව රජයට සිදුවන බවද එම මූල්‍ය වෙළෙඳ පොළ නියෝජිතයෝ ප්‍රකාශ කරති.
අදාළ බැඳුම්කර ලංසු පිළිගත් වහාම මෙම රු.කෝටි 200 කට අධික පාඩුව සිදුව ඇති බවද එම බැඳුම්කර කල් පිරෙන වසර 14 ක කාලය අනුව ගණන් බැලීමේදී මේ පාඩුව මීට වඩා ඉහළ යනු ඇතැයිද ඔවුහු තවදුරටත් අවධාරණය කරති.
ශ්‍යාම් නුවන් ගනේවත්ත