මහබැංකු බැදුම්කර වංචාවට චෝදනා එල්ලවී ඇති අර්ජුන් ඇලෝෂියස් රජයේ ප්‍රබලතම ඇමතිවරයකුගේ බිරියට අධි සුඛෝපභෝගී ‘රේන්ජ් රෝවර්‘ රථයක් තෑගි කර තිබෙනවා.
රජයේ මූල්‍ය පරිපාලනයට සම්බන්ධ ප්‍රබලතම පුද්ගලයෙකු වන අදාල ඇමතිවරයා, බැදුම්කර වංචාවේ ද කොටස්කරුවෙකු බවටයි චෝදනා එල්ලවන්නේ. තීරු බදු සහිතව ශ්රී ලංකා රුපියල් එක්කෝටි අසූලක්ෂයකට අධික වටිනාකමකින් යුතු නවතම මාදිලියේ ‘රේන්ජ් රෝවර්‘ රථය අර්ජුන් ඇලෝෂියස් විසින් තෑගිකර තිබෙන්නේ ඇමතිවරයාගේ බිරිදගේ උපන් දිනය නිමිත්තෙනුයි.
මේ වන විට අර්ජුන් ඇලෝෂියස් විසින් මෙන්ඩිස් මත්පැන් සමාගම මිලයට ගෙන ඇති අතර ලංකාවට එතනෝල් ආනයනය කිරීමේ බලපත්‍රයද ඔහුට ලබා දී තිබෙන බවට දේශපාලන ක්ෂේත්‍රයේ කතාබහට ලක්වනවා. මේ පිළිබදව පසුගිය කැබිනට් රැස්වීමේදී අමාත්‍ය රාජිත සේනාරත්න විසින් අදාල ප්‍රබල ඇමතිවරයාගෙන් විමසීමක් කර තිබිණි.
“මහ බැංකු බැදුම්කර වංචාවට සම්බන්ධ පුද්ගලයින් ද, ස්කාගාර මිලදී ගෙන මත්පැන් නිෂ්පාදනය ආරම්භ කර තිබෙනවා. එතනෝල් ලංකාවට ගෙන්වනවා“ යැයි රාජිත සේනාරත්න ඇමතිවරයා ඊයේ (26) බේරුවල පැවති රැස්වීමකදී ද ප්‍රකාශකර තිබිණි.