උතුර සහ නැගෙනහිර පළාත්ව බෞද්ධ වෙහෙර විහාර ඉදිකිරීමට විරුද්ධව සහ මඩකළපුව මංගලාරාමාධිපති පූජ්‍ය අම්පිටියේ සුමනරතන හිමියන්ට විරෝධය පළ කෙරෙන යෝජනාවක් ඊයේ (24) පැවති උතුරු පළාත්සභාවේ 66 වැනි සැසිවාරයේදී සම්මත කෙරිණි.
පළාත් සභාවේ සභාපති සී.වී.කේ. සිවඥානම් විසින් මෙම යෝජනාව සභාවට ඉදිරිපත් කරනු ලැබූ අතර බහුතර ඡන්දයෙන් එම යෝජනාව සම්මතවිය.
මෙම යෝජනාව ජනාධිපතිවරයා, අගමැතිවරයා සහ පොලිස්පතිවරයා වෙත යොමු කිරීමටද මෙහිදී තීරණය විය.
පළාත්සභාව විසින් යෝජනා සම්මත කරගත්තද ජනාධිපතිවරයාගේ නියෝගය පරිදි ආණ්ඩුකාරවරයාගේ අනුමැතිය රහිතව අදාළ යෝජනා බලාත්මක කළ නොහැකි වේ.
නව ව්‍යවස්ථාව මගින් ඉඩම්, පොලිස්, අධිකරණ හා ප්‍රතිපත්ති සම්පාදනය කිරීමේ පූර්ණ බලතල පළාත්සභාවලට ලබා දීමට නිර්දේශ කර ඇති අතර, පළාත්සභාවේ යෝජනා හා අණපතන් බලාත්මක කිරීමට ජනාධිපතිවරයා නියෝජනය කරන ආණ්ඩුකාරවරයාගේ අනුමැතිය අවශ්‍ය නොමැති බවට සහ ආණ්ඩුකාර ධුරය නාමික තනතුරක් කිරීමට නිර්දේශ යෝජනා කර ඇත. පළාත් මහඇමතිවරයාගේ අභිමතය පරිදි ආණ්ඩුකාරවරයා පත්කළ යුතු බවටද නිර්දේශ කර ඇත.
ඒ අනුව නව ආණ්ඩුක්‍රම ව්‍යවස්ථාව අනුව මධ්‍යම ආණ්ඩුවේ අනුමැතිය රහිතව යෝජනා හා අනපනත් සම්මතකර ක්‍රියාත්මක කිරීමේ බලය පළාත්සභාවට සහ මහඇමතිවරයාට හිමිවේ.
නව ව්‍යවස්ථාව සදහා ඉදිරිපත් කරන ලද අනුකාරක සභා නිර්දේශ ලබන ජනවාරි මුල සතියේදී පාර්ලිමේන්තුවේ විවාදයට ගැනීමට නියමිතය.