ශ්රී ලංකාවට පැමිණෙන් සෑම පුද්ගලයෙකු පිළිබදවම දැඩි විමසිල්ලෙන් පසුවන බව ආරක්ෂක ලේකම් කරුණාසේන හෙට්ටිආරච්චි මහතා පවසයි. ජාත්‍යන්තරයේ කි‍්‍රයාත්මක ත‍්‍රස්ත සංවිධානවල සාමාජිකයින් ශ්රී ලංකාවට පැමිණීම වැළැක්වීම මෙහි අපේක්ෂාව බව ඔහු වැඩිදුරටත් පවසයි.
ඇතැම් පුද්ගලයින් දේශපාලන රැකවරණ පතා සරණාගතයින් ලෙස ද ශ්රී ලංකාවට පැමිණෙන නමුත් ජාත්‍යන්තර නීතිය යටතේ එවැන්නන් හරවා යැවීමට ශ්රී ලංකාවට නොහැකි බව ආණ්ඩුව පවසයි. එවැනි පුද්ගලයින්ගෙන් ද ජාතික ආරක්ෂාවට තර්ජනයක් ඇති නොවීමට විමසිල්ලෙන් කි‍්‍රයාකරන බව ආරක්ෂක ලේකම්වරයා පවසයි.
ශ්රී ලංකාවේ ආගමන විගමන නීති ලිහිල් කර ඇතැයි ද ඒ නිසා ශ්රී ලංකාවේ ජාතික ආරක්ෂාවට තර්ජනයක් ඇති විය හැකි බවට ද ඇතැම් පාර්ශ්ව නගන චෝදනාවලට ප‍්‍රතිචාර දක්වමින් ආරක්ෂක ලේකම් කරුණාසේන හෙට්ටිආරච්චි මහතා මෙම කරුණු දැක්වීය.
මේ වන විට ජාත්‍යන්තරයේ ඉතා ප්රබල ලෙස කි‍්‍රයාත්මක වන අයි.එස්. ත‍්‍රස්ත සංවිධානය නිවේදනයක් නිකුත් කරමින් ඉකුත්දා කියා සිටියේ තමන්ට එරෙහි වන ඕනෑම රටකට ප‍්‍රහාර එල්ල කිරීමට තමන් මැලි නොවන බවයි.
එසේ තිබියදී ශ්රී ලංකාව ආගමන විගමන නීති තවදුරටත් ලිහිල්ව පවත්වා ගැනීම ගැටලූ සහගත බව හෙළ බොදු සවිය සංවිධානය පෙන්වා දී ඇත.