දකුණු අප්‍රිකානු ජනාධිපති සිරිල් රම්පෝසා ට කොවිඩ් -19 වෛරසය ආසාදනය වී තිබේ.
කොවිඩ් රෝග ලක්ෂණ මතුවීම හේතුවෙන් සිදුකළ පරික්ෂණයක දී ජනාධිපතිවරයා වෛරසය ආසාදිතයෙක් බවට හඳුනාගෙන ඇති බව දකුණු අප්‍රිකානු ජනාධිපති කාර්යාලය ප්‍රකාශ කරයි.
ඔහු මේ වන විට කේප්ටවුන් හි ස්වයං-නිරෝධායනට යොමුවී සිටින බව විදෙස් මාධ්‍ය වාර්තා කළේය.
දකුණු අප්‍රිකානු ජනාධිපතිවරයා සුවය ලබන තෙක් රටේ පාලන කටයුතු නියෝජ්‍ය ජනාධිපති ඩේවිඩ් මබුසා ට පවරා ඇති බව විදෙස් මාධ්‍ය සඳහන් කරයි.
පසුගිය සතිය තුළ ජනාධිපතිවරයා සමඟ සමීප සම්බන්ධතා පැවැත්වූ සියලු පාර්ශවයන් කඩිනම් කොවිඩ් පරික්ෂණ සඳහා යොමුවන ලෙස දැනුම් දී ඇති බව දකුණු අප්‍රිකානු ජනාධිපති කාර්යාලය පවසයි.