ගාල්ල අතිරේක මහේස්ත්‍රාත් ලක්මිණි විදානගමගේ නියෝග කර තිබෙන්නෙ තල්පේ, මිහිරිපැන්න ප්‍රදේශයේදී දුම්රියට පැන සියදිවි හානි කර ගැනීමට තැත් කළ 14 හැවිරිදි බාල වයස්කාර දැරියක සුදුසු භාරකරුවෙකු ඉදිරිපත් වන තෙක් කිතුලම්පිටිය ළමා නිවාසයේ රඳවා තැබීමට පියවර ගෙන ඇත.
අප වාර්තාකරු සඳහන් කළේ මෙම දැරිය දුම්රියට පැනීම සඳහා දුම්රිය මාර්ගයේ ගමන් කරමින් සිටියදී ඥාතියෙකු දැක ඇයව බේරා ගෙන පොලිසියට භාර දී ඇති බව ය.
පරීක්ෂණවලදී අනාවරණය වී ඇත්තේ, මෙම දැරියගේ මව වෙනත් විවාහයක් කර ගෙන ඇති අතර පියා ද වෙනත් විවාහයක් කර ගෙන ඇති බව ය.
මෙම දැරිය පියා, කුඩම්මා සහ පියාගේ මව (මිත්තණිය) සමග සිට ඇති බව ත් පියා සහ මිත්තණිය ඇයට නිතර ම පහර දුන් බව දැරිය පවසා ඇති අතර ඒ සම්බන්ධයෙන් මීට පෙර අවස්ථාවක ද පොලිසියට පැමිණිලි කර ඇති බව ත් පරික්ෂණවලදී අනාවරණය වී තිබේ.
මෙම දැරිය පාසල් ගොස් ඇත්තේ, 2 ශ්‍රේණිය දක්වා පමණක් බව පරීක්ෂණවලදී වැඩිදුරට ත් අනාවරණය වී ඇති අතර ඒ පිළිබඳව කිසිදු බලධාරීයෙකු සොයා බලා නොමැති බව අප වාර්තාකරු වැඩිදුරටත් සඳහන් කළේ ය.
හබරාදූව පොලිසිය විසින් දැරිය අධිකරණයට ඉදිරිපත් කරනු ලැබ ඇති අතර පරිවාස දෙපාර්තමේන්තුව වෙනුවෙන් පරිවාස නිලධාරි ප්‍රමිල් විජේතුංග පෙනී සිට තිබේ.