මන්ත්‍රීවරයකු ලෙස දිවුරුම් දීමෙන් අනතුරුව ෆීල්ඩ් මාෂල් සරත් ෆොන්සේකා මහතාහට නීතිය හා සාමය පිළිබඳ අමාත්‍ය ධුරය ලබාදීමට තීරණය කර ඇතැයි ආණ්ඩුවේ අභ්‍යන්තර ආරංචිමාර්ග සඳහන් කරයි.
ඉඩම් ඇමතිව සිටි එම්.කේ.ඒ.ඩී.එස්. ගුණවර්ධන මහතාගේ අභාවයෙන් පසු පුරප්පාඩු වූ මන්ත්‍රී ධුරයට ෆොන්සේකා මහතා පත්කරන බව පාර්ලිමේන්තු ආරංචි මාර්ග තහවුරු කරයි.
ෆොන්සේකා මහතා මන්ත්‍රී ධුරය භාරගන්නා බව ඔහුගේ පුද්ගලික ලේකම් සේනක ද සිල්වා මහතා තහවුරු කළේය.
ප්‍රජාතන්ත්‍රවාදී පක්ෂයේ නායක ෆීල්ඩ් මාෂල් සරත් ෆොන්සේකා මහතා ජාතික ලැයිස්තුවෙන් පත්වන මන්ත්‍රීවරයකු ලෙස ලබන 9 වැනිදා පාර්ලිමේන්තුවේදී කතානායක කරු ජයසූරිය මහතා ඉදිරියේ දිවුරුම් දීමට නියමිතය.
මෛත්‍රීපාල සිරිසේන මහතා ජනාධිපති වීමෙන් පසුව ෆොන්සේකා මහතාට අහිමි වූ විශ්‍රාම වැටුප සහ සෙසු වරප්‍රසාද සියල්ල හිමි වූ අතර, ඔහු ෆීල්ඩ් මාෂල් ධුරයටද උසස් කරනු ලැබීය.