බලයෙන් ඉවත් කළ මියන්මාර නායිකා අවුන්සාන් සුකී ට එරෙහිව එරට හමුදා පාලනය විසින් අල්ලස් හා දූෂණ චෝදනා ගොනු කර තිබේ.
මියන්මාර හිටපු නායිකාවට එරෙහිව මේ දක්වා එල්ල වී ඇති විශාලතම චෝදනාව මෙය වන අතර ඊට වරදකරු වුවහොත් ඇයට වසර 15ක උපරිම සිරදඬුවමට ලක්වීමට සිදුවන බව විදෙස් මාධ්‍ය වාර්තා කළේය.
සුකී විසින් අමෙරිකානු ඩොලර් ලක්ෂ 6ක මුදලක් හා රත්‍රං අල්ලස් ලෙස ලබාගෙන ඇති බවට එරට මිලිටරි කවුන්සිලය විසින් නිකුත් කළ නිවේදනයක දැක්වේ.
සුකීගේ ප්‍රජාතන්ත්‍රවාදී ජාතික ලීගයේ සෙසු ජ්‍යෙෂ්ඨ සාමාජිකයින් රැසකට ද හමුදා පාලනය විසින් අල්ලස් හා දූෂණ චෝදනා එල්ල කර තිබේ.
හමුදා පාලනය විසින් මියන්මාරයේ බලය ලබාගැනීමත් සමග පසුගිය පෙබරවාරි මස පළමුවැනිදා අත්අඩංගුවට ගත් අවුන්සාන් සුකී මේ වන විට නිවාස අඩස්සියේ පසුවෙයි.