තමා දිගටම මහ නුවර නොසිටින බවත් ඉන්න කාලය තුල මහ නුවර සංවර්ධනය සඳහා තමන්ට සිදුකල හැකි සියලු දේ සිදු කරන බවත් මධ්‍යම පළාත් ආණ්ඩුකාර මෛත්‍රී ගුණරත්න මහතා පවසනවා. ඊයේ (14) මල්වත්ත මහා විහාරයේදී මල්වතු පාර්ශවයේ මහනායක හිමි බැහැ දකිමින් ඒ මහතා මේ බව ප්‍රකාශ කර සිටියේය.
වැඩක් නොකරන මිනිහට කිසිම විවේචනයක් එල්ල නොවන බව මෙහිදී සඳහන් කර සිටි මහනායක හිමි මහ නුවර සංවර්ධනය සියලු පාර්ශව සමග සාකච්චා කරමින් දිගටම සිදු කරන ලෙසත්, ආණ්ඩුකාරවරයාගේ සංකල්පයක් මත ඇරඹි “Night Market” එක දළදා වීදියේ නොව වෙනත් සුදුසු ස්ථානයක සිදු කරන ලෙසත් රථවාහන තදබදය සම්බන්දයෙන් වඩාත් සුදුසු රථවාහන සැලැස්මක් ක්‍රියාත්මක කරන ලෙසටත් උපදෙස් ලබා දෙන ලදි.
“කළය හෝදන මිනිහා අතින් තමයි මහනායක හාමුදුරුවනේ කළය කැඩෙන්නේ.” යැයි මෙහිදී ප්‍රකාශ කර සිටි ආණ්ඩුකාරවරයා “Night Market” එක පොදු වෙළඳ පොළ අසල මේ මස අවසාන සතියේ යලිත් ආරම්භ කරන බවත් නව රථවාහන සැලැස්ම ඉතාමත්ම ඉක්මනින් ආරම්භ කිරීමට කටයුතු සුදානම් බවත් මහ නුවර සිදුකරන සියලු කටයුතු පිළිබඳව මහනායක හිමිවරු දැනුවත් කිරීමට පියවර ගන්නා බවත් පැවසීය.