විදෙස් රටවල රැකියා ලබාදෙන බව පවසා විවිධ පුද්ගලයින්ගෙන් රුපියල් කෝටියකට ආසන්න මුදලක් වංචා කළ වෙන්නප්පුව ප්‍රාදේශීය සභාවේ හිටපු මන්ත්‍රීවරයෙකු අත්අඩංගුවට ගෙන තිබේ.
පුද්ගලයින් නව දෙනෙකු විසින් සිදුකළ පැමිණිලි සම්බන්ධයෙන් විමර්ශන සිදුකළ හලාවත කොට්ඨාස වංචා විමර්ශන ඒකකය ඊයේ (17)දින සැකකරු අත්අඩංගුවට ගෙන ඇති බව වාර්තා වේ.
සැකකරු විසින් කොළඹ සහ වෙන්නප්පුව යන ප්‍රදේශ කිහිපයක විදෙස් රැකියා සපයන ආයතන පවත්වාගෙන යමින් රැකියා ලබාදෙන බව පවසා රුපියල් 9,100,000 පමණ මුදලක් වංචා කර ඇති බව හලාවත කොට්ඨාස වංචා විමර්ශන ඒකකය සඳහන් කළේය.
අත්අඩංගුවට ගත් සැකකාර හිටපු ප්‍රාදේශීය සභා මන්ත්‍රීවරයා මාරවිල මහෙස්ත්‍රාත් අධිකරණය වෙත ඉදිරිපත් කිරීමෙන් පසු ලබන 31 වන දින දක්වා රක්ෂිත බන්ධනාගාර ගත කර තිබේ.