හමුදා යථා යෝග්‍යකරණය යටතේ නන්දිකඩාල් වෙල්ලමුල්ලිවයික්කාල් කලපුව ප‍්‍රදේශයේ ස්ථානගතව සිටි පාබල හමුදා බළඇණිය ඉවත් කර දෙහිඅත්තකණ්ඩියේ ස්ථානගතව සිටි 3 වැනි කාන්තා බළඇණිය ස්ථානගත කර ඇත. මෙම කාන්තා බළඇණිය ස්ථානගත කර මාසයක් පමණ වේ.
යුද්ධයෙන් පසු කොටි හිතවාදීන් වැඩි වශයෙන් යුද සැමරුම් පැවැත්වූයේද මේ අවටය.
හමුදා සාමාජිකාවන්ට දිවයිනේ ඕනෑම ස්ථානයක රාජකාරි කළ යුතු වුවත් මෙහි දුෂ්කරතා රැසක් ඇත. ජල පහසුකම් සපයා ගැනීමේදී ද දුෂ්කරතා මතුව ඇත.
මෙම යථායෝග්‍යකරණය යටතේ ප‍්‍රදේශය පුරා විසිරී සිටි සෙබළුන් සීමිත කඳවුරු කිහිපයකට ගොනු කිරීම නිසා ප‍්‍රශ්න රැසක් උද්ගතව ඇත. මේ යථායෝග්‍යකරණයේ ප‍්‍රායෝගික භාවය ගැන ගැටලූ රැසක් පැන නැඟී ඇති බව හමුදාවේ අභ්‍යන්තර ආරංචි මාර්ග කියයි.
එමෙන්ම නන්දිකඩාල් කලපුව අසලට කාන්තා බළඇණියක් ස්ථාපිත කිරීමෙන් ආරක්ෂාව තර වන්නේ දැයි බොහෝ දෙනා විමතිය පළකරති.
මේ යථා යෝග්‍යකරණය ප‍්‍රායෝගික නොවන බව හිටපු හමුදාපති ෆීල්ඞ් මාර්ෂල් සරත් ෆොන්සේකා මහතාද ප‍්‍රකාශ කර තිබිණි. ඒ නිසා මහත් ආන්දෝලනයක් ඇතිවිය.
චතුර පමුණුව – දිවයින