ජුනි 6 වෙනිදා සිට ගතවූ දින 40 තුළ දී දිවයින පුරා සිදුකළ අපරාධ නිවාරණ වැටලීම්වලින් මත්ද්‍රව්‍ය සමග සැකකරුවන් 17,301 දෙනෙකු අත්අඩංගුවට ගත් බව පොලීසිය පවසයි.
ඉන් සැකකරුවන් 9,648 දෙනෙක් හෙරොයින් සමග ද 7,064 දෙනෙක් ගංජා සමග ද, 589 දෙනෙක් අයිස් මත්ද්‍රව්‍ය ජාවාරම් කිරීම සම්බන්ධයෙන් ද පොලිස් බාරයට ගෙන තිබේ.
මෙම සැකකරුවන් සමග හෙරොයින් කිලෝ 13.3ක්, ගංජා කිලෝ 680.7ක් සහ අයිස් කිලෝ 4.2ක් අත්අඩංගුවට ගෙන ඇතැයි පොලිස් මාධ්‍ය කොට්ඨාසය පවසයි.
එසේම දිවයින පුරා සිදුකළ අපරාධ නිවාරණ වැටලීම්වලින් ගිනි අවි 172ක් ද සොයා ගෙන තිබේ. T -56 ගිනි අවි 11ක්, T -81 ගිනි අවියක්, බෝර 12 ගිනි අවි 48ක් ඒ අතර වේ.
වරෙන්තුකරුවන් 15,152ක් ද එම අපරාධ නිවාරණ වැටලීම්වලින් අත්අඩංගුවට ගෙන තිබේ.