ආධුනික පොලිස් කොස්තාපල්වරුන් ස්ථිර සේවයට බඳවා ගැනීමේ පරීක්ෂණයකට කොස්තාපල්වරයකු වෙනුවෙන් ඉදිරිපත් වූ වෙනත් පුද්ගලයකු කළුතර දකුණ පොලිසිය විසින් අත්අඩංගුවට ගෙන තිබේ.
පොලිස් කොස්තාපල්වරුන්ගේ සේවය ස්ථිර කිරීමේ පරීක්ෂණය සඳහා වන පිහිනුම් පරීක්ෂණය එදින පැවැත්වී ඇති අතර අම්බලන්තොට පොලිස් ස්ථානයේ කොස්තාපල්වරයකු වෙනුවෙන් වෙනත් සිවිල් පුද්ගලයකු පරීක්ෂණ භූමියට පැමිණ ඇති බවට ජ්‍යෙෂ්ඨ නිලධාරියකුට තොරතුරක් ලැබී ඇත.
ඒ අනුව සැකකරු අත්අඩංගුවට ගෙන ප්රශ්න කිරීමේදී ඔහුගේ මිතුරකු වෙනුවෙන් පිහිනුම් පරීක්ෂණයට පෙනී සිටීම සඳහා හොර රහසේ පැමිණ ඇති බව තහවුරුවී ඇතැයි පොලිස් නිලධාරියකු සඳහන් කළේය.
අත්අඩංගුවට පත්ව ඇති සැකකරු පිහිනුම් ක‍්‍රීඩාවට ඉතා දක්ෂ පුද්ගලයකු බවට තහවුරු වී ඇතැයි ද වාර්තා වේ.
ඔහු පරීක්ෂණ භූමියට පැමිණීමේදී අම්බලන්තොට පොලිස් ස්ථානයේ රාජකාරි නියුතු නිලධාරියාට නිකුත් කර තිබූ නිල ලාංඡන සහිත නිල ඇඳුම, පොලිස් හැඳුනුම්පත් දෙකක්, විභාග අයැදුම් පත‍්‍රය සහ අදාල කොස්තාපල්වරයාගේ ලිඛිත ප‍්‍රකාශය සහ ජංගම දුරකථනය ද රැගෙන පැමිණි අතර ඒ සියල්ල පොලිස් භාරයට ගෙන ඇත.
සැකකරු කළුතර මහෙස්ත‍්‍රාත් අධිකරණයට ඉදිරිපත් කිරීමට නියමිතව තිබේ.