මහර බන්ධනාගාරයේ ගබඩා කර තිබූ පෙති වර්ග පිළිබඳ විශේෂඥ වෛද්‍ය වාර්තාවක් ලබා ගැනීමට කටයුතු කරන බව පොලීසිය පවසයි.
ඒ, අදාළ පෙති පානය කිරීමෙන් බන්ධනාගාර රැඳවියන් ආවේගශීලි ලෙස හැසිරුණු බවට පළවන මත සම්බන්ධයෙන් නිසි නිගමනයක් ලබා ගැනීම සඳහා ය.
මේ සම්බන්ධයෙන් පරීක්ෂණ මෙහෙයවන අපරාධ පරීක්ෂණ දෙපාර්තමේන්තුවේ කණ්ඩායම් පුළුල් විමර්ශන ආරම්භ කර ඇති බව ද ඔහු ප්‍රකාශ කළේ ය.
නියෝජ්‍ය පොලිස්පති අජිත් රෝහණ මහතා ප්‍රකාශ කළේ, සිද්ධිය සම්බන්ධයෙන් ඊයේ(3) දිනයේත් ප්‍රකාශ 30 ක් ලබා ගත් බවයි.
ඒ අතර බන්ධනාගාර නිලධාරීන් 13 ක්, රැඳවියන් 12 ක් ,බන්ධනාගාර වෛද්‍යවරයෙක් හා පිරිමි හෙද නිලධාරීන් 4 දෙනෙකු ද වන බව නියෝජ්‍ය පොලිස්පතිවරයා කියා සිටියේ ය.
මේ වනවිට සිද්ධිය සම්බන්ධයෙන් ප්‍රකාශ ලබා ගෙන ඇති සමස්ත පිරිස 56 කි.
පසුගියදා සිදුවූ මහර බන්ධනාගාරයේ කලහකාරී සිද්ධියෙන් රැඳවියන් 11 දෙනෙකු මියගිය අතර තවත් 108 දෙනෙකු තුවාල ලැබුවේ ය.
ඒ අතර නිලධාරීන් දෙදෙනෙකු ද වේ .