පොලිස් මුල්‍ය අපරාධ කොට්ඨාශය භාර නියෝජ්‍ය පොලිස්පති රවී විද්‍යාලංකාර මහතා ඇතුළු පොලිස් කණ්ඩායමක් අද අළුයම ඩුබායි බලා පිටත්ව ගොස් ඇති බව වාර්තා වේ. ඒ එහි රඳවාගෙන සිටින, හිටපු රුසියානු තානාපති උදයංග වීරතුංග අත්අඩංගුවට ගැනීම සඳහායි.
උදයංග වීරතුංග ඇමරිකා එක්සත් ජනපදය වෙත යාම සඳහා ඩුබායි ගුවන් තොටුපලට පැමිණි අවස්ථාවේදී ඩුබායි පොලීසිය විසින් ප්‍රශ්න කිරීම සඳහා රඳවාගෙන තිබේ. ඔහුගෙන් ප්‍රශ්න කිරීමෙන් පසුව උදයංග වීරතුංග මුදාහැර ඇති බව පසුව වාර්තා විය. කෙසේ වෙතත් ඩුබායි පොලීසිය මේ බව ශ්‍රී ලංකාව වෙත දන්වා ඇති අතර ශ්‍රී ලංකා පොලීසියේ ඉල්ලීම මත උදයංග වීරතුංග තවදුරටත් රඳවාගෙන ඇති බවයි වාර්තා වන්නේ.
ඔහු රුසියානු තානාපතිවරයා ලෙස කටයුතු කරන සමයේ ශ්‍රී ලංකා හමුදාව වෙත මිග් යානා මිලදී ගැනීමේ ගණුදෙනුවකදී ඔහු මුල්‍ය වංචාවක් සිදුකර ඇති බවට චෝදනා එල්ල වූ අතර අධිකරණය නියෝග කළේ උදයංග වීරතුංග අත්අඩංගුවට ගෙන අධිකරණයට ඉදිරිපත් කරන ලෙසයි.
කෙසේ වෙතත් ඔහු අධිකරණය මගහරිමින් දිගින් දිගටම විදෙස්ගතව සිටි අතර පසුව ඔහුට එරෙහිව ජාත්‍යන්තර රතු වරෙන්තුවක් නිකුත් කෙරිණි.