මඩකලපුව මංගලාරාම විහාරස්ථානයේ අභිනවයෙන් ඉදිකළ විහාර මන්දිරය හිටපු ජනාධිපති මහින්ද රාජපක්ෂ මහතාගේ සුරතින් ඊයේ (11) විවෘත කරන ලදි.
මෙම විහාර මන්දියර ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් විවෘත කිරීමට නියමිතව තිබුනේ පසුගිය ජූලි මසදීය. කිහිප වරක් ආරාධනා කර තිබුණත් ජනාධිපති මෛත්‍රීපාල සිරිසේන මහතා නොපැමිණීමට විරෝධය පලකරමින් මංගලාරාම විහාරාධිපති හිමියන් විසින් එම විහාරස්ථානයේ ජනාධිපතිවරයාගේ නම සඳහන් කර තිබු සමරු ඵලකය කඩා ඉවත් කිරීමට කටයුතු කර තිබිණි.
මඩකලපුව නගරයේ ඇති එකම සිංහල බෞද්ධ විහාරයට පැමිණීමට නොහැකි නම් රටේ ජනාධිපති ගේ වුවත් ඵලකය පන්සලේ ගසාගෙන සිටීමට අවශ්‍ය නැති නිසා තමන් එම ඵලකය කඩා විනාශ කල බව පුජ්‍ය අම්පිටියේ සුමනරතන හිමියන් පැවසූහ.
කෙසේ වෙතත් ඊයේ මඩකලපුව මංගලාරාම විහාරස්ථානයේ පැවති පිංකම සදහා හිටපු ජනාධිපති මහින්ද රාජපක්ෂ මහතා සහභාගී විය. එහිදී ජනාධිපතිවරයාගේ නම තිබූ කඩා බිඳ දැමූ සමරු ඵලකය වෙනුවට හිටපු ජනපති මහින්ද රාජපක්ෂ මහතාගේ නම සඳහන් කර නව සමරු ඵලකයක් ඉදිකර තිබිණි.
එම සමරු ඵලකය හිටපු ජනාධිපතිවරයා විසින් විවෘත කළේය.
