එකම අහස් වියනයක් යට එකම පොළෝ තළක ජීවත්වන යෞවනයන් එකම මිනිස් කොට්ඨාසයක් ලෙසින් ජාති ආගම් භේද ප්‍රතික්ෂේප කරන බව අගමැති රනිල් වික්‍රමසිංහ මහතා ප්‍රකාශ කළේය.
රට පුරා විසිර සිටින තාරුණයේ දස්කම් විස්කම්වලට නව ජීවයක් ලබා දීමටත් තරුණයන්ගේ සිතුම් පැතුම් බෙදා හදා ගැනීමටත් යොවුන්පුරය කදිම තෝතැන්නක් වූ බවද අගමැතිවරයා කීවේය.
අගමැතිවරයා එසේ එසේ සඳහන් කළේ සීගිරියේ දී පෙරේදා (2) සමාප්ත වූ යොවුන් පුරය 2016 ජාතික වැඩසටහනට එක්වෙමිනි. සියළු පළාත් නියෝජනය කරමින් තරුණ තරුණියන් පන්දහසක් පමණ එයට එක්ව සිටි අතර නැටුම් ගැයුම් සංදර්ශන ප්‍රදර්ශන එහි සංවිධානය කර තිබිණි.
තරුණ තරුණියන්ගේ අනාගතය සැකසීම සඳහා යොවුන්පුරය දශක දෙකකට පසු නැවත ආරම්භ කර තිබෙන බවත් එහි පළමු වැන්න පොළොන්නරුව රාජකීය විද්‍යාලයෙන් ඇරඹි බවත් අගමැතිවරයා කීවේය.තිස් වසරක යුද්ධයකට පසු සමස්ථ ජාතියම හොඳ අනාගතයක් අපේක්ෂා කරන බව කී අගමැතිවරයා යුද්ධය නිසා ආසියාවේ රටවල් රැසක් සංවර්ධනය අපි පසු කර ගිය බවත් අපිට විශාල අභියෝගයක් ජයගැනීමට තිබෙන බවත් හෙතෙම කීය.