වයස අවුරුදු 18 ට වැඩි සියලුම ශ්‍රී ලාංකික පුරවැසියන්ට බදු ලිපිගොනු විවෘත කිරීම අනිවාර්ය කළ යුතු බව උසස් අධ්‍යාපන රාජ්‍ය අමාත්‍ය සුරේන් රාඝවන් පැවසු බව economynext වෙබ් අඩවිය වාර්තා කර සිටියි.
වයස 18ට වැඩි ඡන්දදායකයන් රටේ නායකයින් තෝරා ගැනීම රටේ ප්‍රතිපත්තිවලට බලපාන නිසා ඔවුන් බදු ලිපිගොනු ආරම්භ කළ යුතු බව ඔහු සඳහන් කර ඇත.
ජාත්‍යන්තර මූල්‍ය අරමුදල (IMF) සමඟ ඩොලර් බිලියන 3 ක ගිවිසුමක් අත්සන් කිරීමෙන් පසුව, මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා වසර 18 ට වැඩි සියලුම පුරවැසියන්ට බදු ලිපිගොනු විවෘත කරන ලෙස ඉල්ලා තිබේ.
“වයස අවුරුදු 18 දී පුරවැසියන්ට ජනාධිපති තෝරා පත්කර ගැනීමට ඡන්දය දිය හැකි නම්, රටක් ගෙන යන ආකාරය තෝරා ගත හැකි නම්, ඔවුන් බදු ගෙවිය යුතුය,” රාඝවන් සිකුරාදා කොළඹ පැවති මාධ්‍ය හමුවකදී පැවසීය.
“2024 ජනවාරි 01 වන විට වයස අවුරුදු 18 ට වැඩි සියලුම දෙනා බදු ගෙවුවත් නොගෙවුවත් ලියාපදිංචි විය යුතුයි.”
“ඉපැයීම් බදු සීමාවට ගැලපෙන්නේ නම්, ඔබ බදු ගෙවිය යුතුය,” රාඝවන් පැවසීය.
හිටපු ජනාධිපති ගෝඨාභය රාජපක්ෂ මහතා බදු කිහිපයක් අහෝසි කළ අතර ආදායම් බදු අනුපාත අඩු කරමින් බදු සීමාව ඉහළ නැංවීමෙන් පසු අඩුම බදු ආදායමක් ඇති රටවලින් එකක් වන්නේ ශ්‍රී ලංකාවයි.