විවෘත වරෙන්තුකරුවකු අත්අඩංගුවට ගැනීම සඳහා දැදිගම ගුරුදෙනිය ප්‍රදේශයට ගිය පොලිස් කණ්ඩායමකට සැකකරු එල්ල කළ පිහි ප්‍රහාරවලින් පොලිස් කොස්තාපල්වරයෙකු සහ සැරයන්වරයෙකු තුවාල ලබා කෑගල්ල මහ රෝහලට ඇතුළත් කර ඇති බව පොලිසිය පවසයි.
මෙම සැකකරු ගුරුදෙණිය ප්‍රදේශයේ වෙල්යායක සිටින බවට ඊයේ (30) සවස පොලිසියට ලද තොරතුරකට අනුව පොලිස් පරීක්ෂකවරයෙකු, පොලිස් සැරයන්වරයකු හා කොස්තාපල්වරුන් දෙදෙනෙකු. සැකකරු අත්අඩංගුවට ගැනීමට සූදානම් වූ අවස්ථාවේ, ඔහු පොලිස් නිලධාරීන් සමග පොරබදා, ඔහගේ ඉනේ සඟවාගෙන සිටි පිහියකින් පොලිස් නිලධාරීන් දෙදෙනාට පහර දී තුවාල සිදුකර ඇත.
පොලිස් නිලධාරීන් මහත් පරිශ්‍රමයක් යොදා සැකකරු මෙල්ල කර අත්අඩංගුවට ගෙන ඇත.
සැකකරු (55) හැවිරිදි බෙලිගල ප්‍රදේශයේ පදිංචිකරුවෙකි.