රට සෞභාග්‍යමත් කිරීමට පැමිණි ආණ්ඩුව පසුගිය මාස 15 ක කාලය තුළ හතර දෙනෙකුගෙන් යුත් පවුලක් රුපියල් ලක්ෂ 6කින් ණය කාරයින් කර ඇතැයි සමගි ජන බලවේගය පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා කොළඹදී පැවසීය.
ඒ අනුව රාජපක්ෂ ආණ්ඩුව පත් වූ මාස 15 තුල එක් පුද්ගලයකු රුපියල් එක් ලක්ෂ පනස් එක් දහසකින් ණය කාරයින් බවට පත්ව ඇතැයි ද මන්ත්‍රීවරයා සඳහන් කළේය.
ආර්ථික දැක්මක් අවබෝදයක් නැති රාජපක්ෂ පවුල පරිසරය, ආර්ථිකය, කෘෂිකර්මය අධ්‍යාපනය ආදී සියල්ල විනාශ කරමින් යන බවද කොළඹ මාක්ස් ප්‍රනාන්දු මාවතේ විපක්ෂනායක කාර්යාලයේ පැවති මාධ්‍ය හමුවකට එක්වෙමින් ඔහු මේ බව පැවසීය.
ගෝඨාභය රාජපක්ෂ, මහින්ද රාජපක්ෂ, බැසිල් රාජපක්ෂ, චමල් රාජපක්ෂ, නාමල් රාජපක්ෂ, ශෂීන්ද්‍ර රාජපක්ෂ ඇතුළු රාජපක්ෂ පවුලේ සියලුම අයියලා එකතු වී රට පාලනය කළත් රට ගොඩ ගැනීම සඳහා ශක්තියක් ඔවුන්ට නොමැති බවත් මන්ත්‍රීවරයා වැඩිදුරටත් සඳහන් කළේය.