මේ වසරේ ගතවූ මාස හය ඇතුළතදී එච්.අයි.වී. ආසාදිතයන් 128 දෙනෙක් හඳුනාගෙන ඇතැයි ලිංගාශ්‍රිත රෝග පිළිබඳ මධ්‍යස්ථානය කියා සිටී. මේ අතරින් 70%ක් පුරුෂයින් බව පැවසේ.
සමලිංගික සබඳතා එච්.අයි.වී. පැතිරයාමට හේතුවක් වී ඇතැයි ජාතික ලිංගාශ්‍රිත රෝග පිළිබඳ මධ්‍යස්ථානයේ අධ්‍යක්ෂ වෛද්‍ය සිසිර ලියනගේ මහතා පැවසීය.
එච්.අයි.වී. ආසාධිතයන් වැඩි පිරිස වයස අවුරුදු 25 – 45 අතර පසුවන බවද කී ඒ මහතා වයස අවුරුදු 15 – 25 අතර පිරිසෙත් 10%ත් 15%ත් අතර එච්.අයි.වී. ආසාධිතයන් සිටින බව හඳුනාගෙන ඇතැයි ද ඔහු කීය.
මේ වන විට එච්.අයි.වී. ආසාධිතයන් දෙදහසක් පමණ සමාජයේ සිටින බව හඳුනාගෙන ඇතැයිද, එය හඳුනා නොගත් අයත් ගණනය කළහොත් හාරදහසක් පමණ විය හැකි බවද සිසිර ලියනගේ මහතා පැවසීය.දැනට එච්.අයි.වී. ආසාධිතයන් වැඩි පිරිසක් වාර්තා වී ඇත්තේ කොළඹ ප්‍රදේශයෙන් බවද ඔහු කියා සිටියේය.
වසර 1985 සිට මේ දක්වා එච්.අයි.වී. ආසාධිතයන් 2,438ක් හඳුනාගෙන ඇතැයිද ඒ අතරින් මේවන විට 390ක් ජීවිතක්ෂයට පත්ව ඇතැයිද ඔහු සඳහන් කළේය.