Colombo Today Local News

ආරක්‍ෂක මාණ්‌ඩලික ප්‍රධානී අද්මිරාල් රවීන්ද්‍ර විඡේගුණරත්න CID අත්අඩංගුවට ගන්න යයි

දෙමළ ජාතික සන්ධානයේ යාපනය දිස්‌ත්‍රික්‌ පාර්ලිමේන්තු මන්ත්‍රීවරයකුව සිටි නඩරාජා රවිරාඡ් මහතාට වෙඩිතබා ඝාතනය කිරීමේ සිද්ධියට සම්බන්ධ ප්‍රධාන විත්තිකරුවකුට රටින් පලා යැමට ආධාර කළ බවට චෝදනා ලැබ සිටින ආරක්‍ෂක මාණ්‌ඩලික ප්‍රධානී අද්මිරාල් රවීන්ද්‍ර විඡේගුණරත්න මහතා අපරාධ පරීක්‍ෂණ දෙපාර්තමේන්තුව මඟින් අත්අඩංගුවට ගැනීමට යයි.

අද්මිරාල්වරයාට එරෙහිව පුළුල් විමර්ශනයක්‌ මේ වනවිටත් ක්‍රියාත්මක කරගෙන යන අතර ඉදිරි දිනවලදී ඒ මහතා අත්අඩංගුවට ගැනීමට නියමිත බව පොලිස්‌ මූලස්‌ථාන ආරංචි මාර්ග කියා සිටියි.

මේ සම්බන්ධයෙන් අපරාධ පරීක්‍ෂණ දෙපාර්තමේන්තුව කොටුව මහෙස්‌ත්‍රාත් අධිකරණය වෙත කරුණු ඉදිරිපත් කර ඇති බව ද පොලිස්‌ මූලස්‌ථාන ආරංචි මාර්ග වැඩිදුරටත් කියා සිටියේය.

නඩරාජා රවිරාඡ් ඝාතන සිද්ධියේ ප්‍රධාන විත්තිකරුවකු වූ නේවි සම්පත් නමැත්තා බෝට්‌ටුවක්‌ මාර්ගයෙන් විදේශගත කළ බවට අද්මිරාල්වරයාට එරෙහිව චෝදනා එල්ල වී ඇත.

නේවි සම්පත් නමැති පුද්ගලයා දෙමළ ශිෂ්‍යයන් එකොළොස්‌ දෙනෙක්‌ පැහැරගෙන ගොස්‌ අතුරුදන් කිරීමේ සිද්ධියේ හත්වැනි සැකකරු බව ද පොලිසිය පවසයි.

නඩරාජා රවිරාඡ් ඝාතන සිද්ධිය සම්බන්ධයෙන් අධිකරණය ලබාදුන් නියෝගය අභියෝගයට ලක්‌කළ නීතිපතිවරයා විසින් අභියාචනයක්‌ ඉදිරිපත් කරන ලදී.

ඒ අනුව රවිරාඡ් ඝාතන සිද්ධියේ විත්තිකරුවන් තිදෙනකු නැවත අධිකරණය වෙත ඉදිරිපත් වූ අතර නේවි සම්පත් නමැති විත්තිකරු රටින් පලා ගියේය.

මෙම විත්තිකරු රටින් පැන යැම සම්බන්ධයෙන් අපරාධ පරීක්‍ෂණ දෙපාර්තමේන්තුව පුළුල් විමර්ශනයක්‌ පැවැත් වූ අතර නාවික හමුදාවේ ඉහළ නිලධාරීන් ඇතුළු තවත් නිලධාරීන් පිරිසකගෙන් ප්‍රශ්න කර තිබිණි.

අද්මිරාල් රවීන්ද්‍ර විඡේගුණරත්න මහතා මෙම සිද්ධිය වන කාලසීමාවේ නාවික හමුදාපතිවරයා ලෙස රාජකාරී කරමින් සිටියේය.

නේවි සම්පත්ට රටින් පැන යැමට උපකාර කළ අන්දම සම්බන්ධයෙන් සාක්‍ෂි රැසක්‌ ද අපරාධ පරීක්‍ෂණ දෙපාර්තමේන්තුව සතු බව පොලිස්‌ ආරංචි මාර්ග කියා සිටියේය.

නාවික හමුදාපතිවරයා ලෙස කටයුතු කරද්දී හම්බන්තොට වරායේදී මාධ්‍යවේදියකුට පහරදීම සම්බන්ධයෙන් ද රවීන්ද්‍ර විඡේගුණරත්න මහතාට එරෙහිව චෝදනා එල්ල වී තිබිණි.

– Divaina

Related posts

තවත් නාකොටික් නිලධාරියෙකු අත්අඩංගුවේ

colombotoday

කථානායක මාන්නප්පෙරුමට සති හතරක් මැතිසබේ තහනම් කරයි

Admin

අගමැතිගෙන් චිට් තුනක්..! අනුර, සම්බන්ධන්, සුමන්තිරන් නැගිට යයි..! පාර්ලිමේන්තුවේ ඊයේ වු අමුතු වැඩේ මෙන්න..!

colombotoday

‍ඉන්දියානු නාවික බලය පෙන්වන්න ‘වික්‍රම්ආදිත්‍ය’ කොළඹ එයි

colombotoday

දිවයින පුරා රෝහල්වල කනිෂ්ඨ සේවකයෝ වැඩ වර්ජනයක්

Admin

සේවයෙන් පැන ගිය ත්‍රිවිධ හමුදා සෙබළුන්ට විශේෂ දැනුම්දීමක්

Admin