නව වැට් බදු සංශෝධනයට අනුව දුරකථන ඇමතුම් ගාස්තුව සියයට 49.5කට වැඩි අගයකින් වැඩිවිය හැකි බව විදුලි සංදේශ නියාමන කොමිෂන් සභාව පවසනවා. ගාස්තු අයකරන නව ක්‍රමවේදය පිළිබඳව මේ වන විට මහා භාණ්ඩාගාරය සමග සාකච්ඡා කරමින් සිටින බවයි විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් සුනිල් එස්. සිරිසේන මහතා පවසන්නේ.
ඇතැම් දුරකථන සමාගම් මේ වන විටත් වැට් බද්ද ඇතුළත් කොට තම දුරකථන ගාස්තු ඉහළ දමා ඇති බව පෙන්වා දෙන ඒ මහතා එහිදී පාරිභෝගිකයාට ‘බද්ද මත බද්දක්’ දැරීමට සිදුව ඇති බව අනාවරණය වී ඇති බව පවසනවා. අදාල සමාගම් ඒ පිළිබඳ මහා භාණ්ඩාගාරය සමග සාකච්ඡා කර එම පියවර ගෙන ඇති බව පැවසුවද, එම ක්‍රමවේදය පාරිභෝගිකයාට අසාධාරණයක් බැවින් ගාස්තු අය කරන ක්‍රමවේදය පිළිබඳව විදුලි සංදේශ නියාමන කොමිෂන් සභාව මහා භාණ්ඩාගාරය සමග සාකච්ඡා කරන බව ද හෙතෙම පවසනවා. ඒ අනුව ඉදිරියේදී ගාස්තු අය කරන ක්‍රමවේදය පිළීබඳව සියලු දුරකථන සමාගම් සහ පාරිභෝගිකයන් දැනුවත් කරනු ඇති.
නව බදු පැනවීමට පෙර දුරකථන ගාස්තු වශයෙන් අයකරනු ලැබ ඇත්තේ, සියයට 25ක විදුලි සංදේශ බද්දක් සහ රජයේ වෙනත් බදු වශයෙන් සියයට 2.5ක ගාස්තුවක එකතුව වන සියයට 27.5කි. නව බදු සංශෝධනය නිසා එම ගාස්තුවට වැට් බද්ද සහ ජාතිය ගොඩනැගීමේ බද්ද ද එකතු වී තිබෙනවා. ඒ අනුව මේ වන විට මෙරට දුරකථන සමාගම් තුනක් විදුලි සංදේශ බද්ද සියයට 26.04 දක්වා ඉහළ දමා ඇති අතර, ජාතිය ගොඩනැගීමේ බද්ද ඇතුළුව රජයේ වෙනත් බදු වශයෙන් සියයට 4.16ක් ද එයට එක්කර තිබේ. එම බදු දෙකේ එකතුවට වැට් බදු ලෙස සියයට 19.53ක් ද දුරකථන ගාස්තුවට එක්කර තිබෙනවා. ඒ අනුව නව වැට් බදු පැනවීම තුළින් මේ වන විටත් සිය පාරිභෝගිකයන්ගෙන් සියයට 49.73 ක් අයකර ගැනීමට එම දුරකථන සමාගම් කටයුතු කර ඇති බවයි වාර්තා වන්නේ.
Neth Fm