ඉදිරි දින කිහිපයේ දී සිදු කිරීමට සැලසුම් කර තිබූ අමාත්‍ය මණ්ඩල සංශෝධනය තවත් මාස කිහිපයකින් කල් දමා දැමීමට ජනාධිපතිවරයා විසින් තීරණය කර ඇතැයි දේශපාලන ආරංචි මාර්ග කියා සිටියි.
ජනාධිපති මෛත්‍රීපාල සිරිසේන සහ අග්‍රාමාත්‍ය රනිල් වික්‍රමසිංහ යන මහත්වරුන්ගේ ප්‍රධානත්වයෙන් ඉකුත් සිකුරාදා ජනාධිපති නිල නිවසේ පැවති විශේෂ සාකච්ඡාවකදී මෙම තීරණයට එළඹ ඇතැයි එම ආරංචිමාර්ග පවසයි.
මෙම සාකච්ජාවට ශ්‍රී ලංකා නිදහස් පක්ෂය සහ එක්සත් ජාතික පක්ෂය නියෝජනය කරන අමාත්‍යවරුන් පිරිසත් ද එක්ව සිටි බව වාර්තා වේ.
යහපාලන රජයේ අමාත්‍යවරුන් කිහිප දෙනෙකුට එල්ලවී ඇති දූෂණ චෝදනා සැලකිල්ලට ගෙන අමාත්‍ය මණ්ඩල සංශෝධනයක් සිදු කිරීමට ජනාධිපතිවරයා තීරණය කර තිබිණ.
කෙසේ වෙතත් සිකුරාදා පැවති සාකච්ඡාවේ දී ඇතිකර ගත් එකඟතාව අනුව අමාත්‍ය මණ්ඩල සංශෝධනය මෙලෙස කල්දමා ඇත.