ප්‍රදේශවාසීන්ගේ පැමිණිලි මත සිය නැන්දම්මාට පහර දුන් බව කියන මහනුවර ප්‍රධාන පෙළේ පාසලක ගුරුවරියක් ඊයේ පොලිස් අත්අඩංගුවට ගත් බව පොලිසිය කියයි.
ගෙලිඔය ප්‍රදේශයේ පදිංචි අදාළ ගුරුවරිය තම 80 හැවිරිදි නැන්දම්මාට පහර දෙන බවට ප්‍රදේශවාසීන් පොලිස් 119 හදිසි ඇමතුම් අංශයට දැනුම් දී තිබේ.
ඒ අනුව, එම ස්ථානයට පැමිණි පොලිසිය, සැකකාර කාන්තාවට දන්වා ඇත්තේ ප්‍රකාශයක් සටහන් කර ගැනීම සඳහා දවුලගල පොලිස් ස්ථානයට පැමිණෙන ලෙසයි.
වින්දිතයාට පහරදීමට ගුරුවරිය පමණක් නොව ඇගේ මව සහ ඇගේ දියණියද සම්බන්ධ බව වාර්තා විය.
පිළිකා රෝගයෙන් පෙළෙන ගුරුවරියගේ නැන්දම්මා අවස්ථා ගණනාවකදී පහරදීම්වලට ලක්ව ඇති බව පරීක්ෂණවලදී අනාවරණය වි ඇත.
පොලිසිය ගුරුවරියට දැඩි ලෙස අවවාද කර ඇති අතර, වින්දිත මවට දිගින් දිගටම පහරදීම් කළහොත් ඇයට එරෙහිව නඩු පවරන බව දන්වා තිබේ.