බන්ධනාගාර රැඳවියන්ව සතියකට දින 02ක් හමුවීම සඳහා අමුත්තන්ට අවස්ථාව ලබාදෙන බව බන්ධනාගාර දෙපාර්තමේන්තුව පවසයි.
එම අවස්ථාව නිරෝධායන සීමා පැවති සමයේ අත්හිටුවා තිබූ අතර ඔක්තෝබර් 04 වනදා සිට බන්ධනාගාර රැඳවියන්ව බැලීමට අමුත්තන්ට සතියකට එක් වතාවක් අවසර ලැබුණි.
එහිදී ඥාතීන් විසින් රැඳවියන්ට ලබාදීම සඳහා රැගෙන එන බත් පාර්සලය එක් රැඳවියෙකුට පමණක් සීමා වන ලෙස රැගෙන එන ලෙසත් එම දෙපාර්තමේන්තුව නිවේදනය කරයි.
එලෙස බත් පාර්සලය රැගෙන ඒමේදී ව්‍යංජන වර්ග වෙනත් භාජනවල හෝ කවර වැනි දේ තුළ නොදමා බත් පාර්සලය තුළම පමණක් දමා රැගෙන එන ලෙසත් දැනුම් දෙයි.
මේ අතර රැඳවියන් ට බන්ධනාගාර ආපනශාලාවෙන් සතියකට සරිලන ආහාර හා සනීපාරක්ෂක ද්‍රව්‍ය ලබාගැනීමට දී තිබූ අවස්ථාව එලෙසම ක්‍රියාත්මක වන බව ද බන්ධනාගාර දෙපාර්තමෙන්තුව වැඩිදුරටත් පැවසීය.
කොවිඩ් -19 වසංගතය හේතුවෙන් පසුගිය අගෝස්තු 07 වනදා සිට බන්ධනාගාරගත රැඳවියන් ට අමුත්තන් පෙන්වීම තාවකාලිකව නතර කිරීමට බන්ධනාගාර දෙපාර්තමේන්තුව තීරණය කළේය.