කොවිඩ් වෛරස ආසාදිතයන් රෝහල් ගතකිරීම සහ මරණයට පත්වීම කැපී පෙනෙන ලෙස අවම කරන ඖෂධ පෙත්තක් ඇමරිකානු ෆයිසර් සමාගම විසින් නිෂ්පාදනය කර තිබෙන බව විදෙස් මාධ්‍ය වාර්තා කරයි.
මෙම කොවිඩ් පෙත්ත පැක්ස්ලොවිඩ් ලෙස නම් කර තිබෙන අතර කොවිඩ් ආසාදනය වී සුළු රෝග ලක්ෂණ පෙන්නුම් කරන රෝගීන්ට ලබාදිය හැකි බව වර්තා වේ.
එම පෙත්ත සියයට 89ක ශක්‍යතාවකින් යුක්ත වන බවත් ඖෂධය ලැබූ පුද්ගලයන් රෝහල් ගතකිරීම් සහ මරණයට පත්වීම කැපී පෙනෙන ලෙස අඩු වී තිබෙන බව එහි සායනික පරීක්ෂණවලින් අනාවරණ වී ඇත.
අවදානම් කාණ්ඩයේ ආසාදිතයන් 1,219 දෙනෙකුට පැක්ස්ලොවිඩ් ඖෂධය ලබාදීමෙන් අනතුරුව රෝහල්ගත කිරීම සිදුව ඇත්තේ ඉන් සියයට දශම බින්දුවයි අටක් පමණක් වන අතර එයට සාපේක්ෂව ඖෂධය ලබා නොදුන් පුද්ගලයන් අතරින් සියයට හතක් රෝහල් ගත කිරීමට සිදුව තිබේ.
රෝග ලක්ෂණ පෙන්වා දින 5 කට පසු ෆයිසර් සමාගමේ කොවිඩ් පෙත්ත ලබාදුන් පුද්ගලයන් අතරින් සියයට එකක් පමණක් රෝහල් ගතකිරීමට සිදුව ඇති අතර කිසිවෙකු මියගොස් නැති අතර ඖෂධය ලබා නොදුන් සාම්පල නියැදියේ පුද්ගලයන් අතුරෙන් සියයට 6.7 ක් රෝහල් ගතකර ඇති අතර, ඉන් 10 දෙනෙකු ජීවිතක්ෂයට පත්ව තිබේ.
මෙම ඖෂධය ක්‍රියාත්මක වන්නේ කොවිඩ් වෛරසය මිනිස් සිරුර තුළ ප්‍රගුණනය වීමට අවශ්‍ය එන්සයිමයක් වැළැක්වීමෙනි.
එය රිටොනවීර් නැමති වෛරස්නාශක ඖෂධය සමඟ ලබාදුන් විට සිරුර තුළ වැඩි කාලයක් පවතින බවයි අනාවරණ වී ඇත.
පැක්ස්ලොවිඩ් ෆයිසර් කොවිඩ් පෙත්ත තවදුරටත් සායනික පරීක්ෂණ මට්ටමේ පැවතුණද ඇමරිකා එක්සත් ජනපදය සහ බ්‍රිතාන්‍ය විසින් එම පෙති ලක්ෂ ගණනක් දැනටමත් ඇණවුම් කර තිබේ.