කොටපොල ප්‍රාදේශීය ලේකම් බල ප්‍රදේශයේ, මහවිල මූකලාන, අක්කර 30ක රක්ෂිතයේ වසර සිය ගණනක් ඉපැරණි ගස් කපා විනාශ කරන බවට ප්‍රදේශවාසීන් චෝදනා කරති.
ප්‍රදේශය හරහා හමා ගිය දැඩි සුළඟක් හේතුවෙන් රක්ෂිතයේ ගස් මාර්ගයට වැටී තිබීම හේතුවෙන් ඒවා ඉවත් කිරීමට ලබා දුන් බලපත්‍ර උල්ලංඝණය කරමින් ටෙන්ඩර්කරුවන් මෙම ඉපැරණි ගස් කපා දමන බව ප්‍රදේශවාසින් පවසා සිටියි.
ඉකුත් වසරේ නොවැම්බර් මාසයේ දී බලපෑ අයපහත් කාලගුණය හේතුවෙන් කොටපොළ, මහවිල මූකලාන රක්ෂිතයේ ගස් කඩා වැටීමෙන් ප්‍රදේශවාසීන්ගේ ගමනාගමනයට බාධා එල්ල වුණි.
මේ හේතුවෙන් වන සංරක්ෂණ දෙපාර්තමේන්තුව විසින් දැව සංස්ථාව හරහා ටෙන්ඩර් කැඳවමින් කඩා වැටුණු ගස් ඉවත් කිරීමට කටයුතු කළේය.
එහෙත් ටෙන්ඩර්කරුවන් විසින් බලපත්‍ර උල්ලංඝණය කරමින් මාසයක පමණ කාලයක සිට රක්ෂිතයේ වසර සිය ගණනක් ඉපැරණි රූස්ස ගස් විශාල ප්‍රමාණයක් කපා දමා තිබේ.
මේ අතර කොටපොල ප්‍රාදේශීය ලේකම්වරයා ඊයේ (16)දින පැමිණ රක්ෂිතය නීරීක්ෂණය කළ අතර එහිදී ගම්වාසින්, නිලධාරින් හා ගස් කපා දැමු පිරිස අතර උණුසුම් තත්ත්වයක් ද හටගෙන ඇත.