තමාගේ ආදර ප්‍රතිවාදියා අපහසුතාවයට පත් කිරීම සඳහා ව්‍යාජ ත්‍රස්ත කුමන්ත්‍රණයක් නිර්මාණය කළ බව ඔස්ට්‍රේලියානු ක්‍රිකට් ක්‍රීඩක උස්මාන් ක්වාජාගේ සොහොයුරා අධිකරණයේ දී පිළිගෙන තිබේ.
එහිදී අර්සලාන් ක්වාජා, තමා බියගුල්ලෙක් ලෙස හඳුන්වා ගත් බවද විදෙස් මාධ්‍ය වාර්තා කරයි.
යුක්තියේ මාවත විකෘති කිරීම ඇතුළු චෝදනා 4කට තමා වැරදිකරු බව අර්සලාන් ක්වාජා පිළිගෙන ඇති අතර ඉදිරි දිනයක ඔහුගේ දඬුවම අධිකරණය විසින් ප්‍රකාශයට පත් කිරීමට නියමිතය.
නිව් සවුත් වේල්ස් දිස්ත්‍රික් අධිකරණය තුළදී ක්වාජා හඬා වැටී ඇති අතර 2017 සහ 2018 වසර වලදී කාන්තාවන් දෙදෙනෙකුගේ අවධානය ලබාගැනීම සඳහා තම මිතුරන් දෙදෙනෙකුට එරෙහිව ව්‍යාජ පැමිණිලි කළ බව ඔහු පිළිගෙන තිබේ.
අර්සලාන් ක්වාජාට වසර 10ක උපරිම සිර දඬුවමක් හිමිවීමට නියමිතය.
2018 වසරේ මැද භාගයේදී, තම විශ්වවිද්‍යාල සගයෙක් වූ ශ්‍රී ලාංකිකයෙක් වන මොහොමඩ් කමර් නිසාම්ඩීන් ගේ සටහන් පොතෙහි සිය අත්අකුරින් විවිධ සටහන් තබා ඇත.
පසුව ඔහු එම සටහන් පොත විශ්වවිද්‍යාලයේ ආරක්ෂක අංශයට දී තිබේ.
එම ව්‍යාජ සටහන් වල දක්වා ඇත්තේ අයිඑස්අයිඑස්, ජිහාඩ් සහ ත්‍රස්ත ප්‍රහාර එල්ල කිරීම සම්බන්ධයෙනි.
“බෝම්බ සහ අවි ආයුධ පුහුණුව ලංකාවේ දී ලබාගන්න,” ඉන් එක් සටහනක දක්වා තිබුණි.
ඔස්ට්‍රේලියානු දේශපාලඥයින් සහ සිඩ්නි ඔපෙරා මන්දිරය වැනි එරටෙහි සුවිශේෂ ස්ථාන ඉලක්ක කරමින් ප්‍රහාර එල්ල කිරීම පිළිබඳව ද එම සටහන්වල දක්වා තිබේ.
විශ්වවිද්‍යාලයේ සේවය කළ ශකීලා ෂහීඩ් නම් තරුණිය දිනා ගැනීමේ අදහසින් තමා නිසාම්ඩීන් ව පැටලවූ බවය.
“මට නිසාම්ඩීන් ව අමාරුවේ දාන්න වුවමනාවක් තිබ්බේ නෑ. ඔහු හොඳ කෙනෙක්. ඒ වගේම මගේ හොඳ මිතුරෙක්.”
මෙම සිද්ධිය සම්බන්ධයෙන් නිසාම්ඩීන් ව ඔස්ට්‍රේලියානු ප්‍රති-ත්‍රස්ත පොලීසිය විසින් අත්අඩංගුවට ගෙන සති 4ක් පමණ රිමාන්ඩ් භාරයේ සිටි අතර පසුව ඔහුට ඇප ලැබුණි.
2018 ඔහුට එරෙහි චෝදනා ඉවත් කර ගැනීමට ඔස්ට්‍රේලියානු බලධාරීන් ක්‍රියා කළේය.