සෞඛ්‍ය ඇමැති රාජිත සේනාරත්න මහතාගේ මැදිහත් වීමෙන් රුපියල් කෝටි 5000 ක් වටිනා ප‍්‍රමිතියෙන් තොර බාල පිළිකා ඖෂධ මිලදී ගැනීමට දරන උත්සාහය වහාම නතර කරන්නැයි රජයේ වෛi නිලධාරීන්ගේ සංගමය ජනාධිපති මෛත‍්‍රිපාල සිරිසේන මහතාගෙන් ඉල්ලීමක් කර ඇත.
මෙම ඖෂධ මිලදී ගැනීම සඳහා මේ වන විට වසර 15 කට බලපැවැත්වෙන පරිදි ගිවිසුමක් අත්සන් කිරීමට යන බවත්, ජනාධිපතිවරයා එ් සම්බන්ධයෙන් දැනුවත් කළ බවත් රජයේ වෛi නිලධාරීන්ගේ සංගමයේ ලේකම් හරිත අලූත්ගේ මහතා ‘දිවයින’ට ඊයේ (07දා) පැවසීය. මේ සම්බන්ධයෙන් සෞඛ්‍ය අමාත්‍යාංශ ලේකම්වරිය හා විගණකාධිපතිවරයා දැනුවත් කිරීමට පියවර ගත් බවද ඔහු කීය.
මෙම අත්සන් කිරීමට යෝජිත ගිවිසුම සම්බන්ධයෙන් සුළු හා මධ්‍ය පරිමාණ ව්‍යාපාරිකයන්ද ජනාධිපතිවරයා දැැනුවත් කර ඇතැයි එ් මහතා කීය. ඖෂධයක් මිලදී ගැනීමට පෙර ජාතික ඖෂධ නියාමන අධිකාරියේ අනුමැතිය ලබා ගත යුතු නමුත් රුසියාවෙන් ගෙන්වීමට යන ඖෂධ සඳහා එවැනි අනුමැතියක් ලබාගෙන නැතැයිද එ් මහතා කීය.
මෙම ඖෂධය මිලදී ගැනීම සඳහා යෝජිත ගිවිසුමට අත්සන් කළහොත් රජයට සිදුවන රුපියල් කෝටි 5000 ක ආර්ථික පාඩුවට අමතරව ප‍්‍රමිතියෙන් තොර ඖෂධ ලබාගැනීම, වසර 15 ක් යනතෙක් කිසිදු රජයකට ප‍්‍රමිතියෙන් තොර නව ඖෂධයක් මිලදී ගැනීමට නොහැකිවීම, (මෙම ඖෂධය අත්හිටුවනු ලැබුවහොත් වන්දියක් ගෙවීමට සිදුවීම නිසා) ඇතුළු ගැටලූ රැසකට මුහුණ දීමට සිදුවන බවද අලූත්ගේ මහතා කීය.
රුසියාවෙන් ගෙන්වන පිළිකා ඖෂධ අතර මේවන විටත් පියයුරු පිළිකා සඳහා ගෙන්වන ඖෂධය ප‍්‍රමිතියෙන් තොරවීම නිසා පිළිකා රෝග විශේෂඥයන් රැසක් එම එන්නත රෝගීන්ට ලබාදීම ප‍්‍රතික්ෂේප කර ඇතැයි වාර්තා වී තිබෙන බවත් එ් මහතා වැඩිදුරටත් කීය.