ජනතා විමුක්ති පෙරමුණ විසින් ඉදිරිපත්කර ඇති 20වැනි ආණ්ඩුක්‍රම ව්‍යවස්ථා සංශෝධන යෝජනාව ඉතාම යුක්ති සහගත බව ආණ්ඩුක්‍රම ව්‍යවස්ථා ප්‍රතිසංස්කරණය පිළිබඳ මහජන අදහස් විමසීමේ කමිටුවේ සභාපති අධිනීතීඥ ලාල් විජේනායක මහතා පවසයි.
දිගු කාලයක් තිස්සේ පොරොන්දුවක් පමණක් වූ විධායක ජනාධිපති ක්‍රමය අහෝසි කිරීම මේ වන තෙක් සිදු නොකිරීම හා ආණ්ඩුක්‍රම ව්‍යවස්ථාවක් ස්ථාපිත කිරීමේ ක්‍රියාවලිය මන්දගාමී වීම යන කරුණු හේතුවෙන් ජනතා විමුක්ති පෙරමුණ මෙම යෝජනාව ඉදිරිපත් කිරීම යුක්ති සහගත බව ලාල් විජේනායක මහතා පෙන්වාදෙයි.
විධායක ජනාධිපති ක්‍රමය අහෝසිකිරීමට අදාල යෝජනා ඇතුලත් 20වැනි ආණ්ඩුක්‍රම ව්‍යවස්ථා සංශෝධනය (25) දා පෞද්ගලික මන්ත්‍රී යෝජනාවක් ලෙස පාර්ලිමේන්තු මහලේකම් ධම්මික දිසානායක මහතා වෙත ජනතා විමුක්ති පෙරමුණ විසින් භාරදෙන ලදී.