බ්‍රිතාන්‍ය පාලනයෙන් ශ්‍රී ලංකාව නිදහස ලබා වසර 70වක් සපිරීම නිමිත්තෙන් පැවැත්වෙන නිදහස් සමරුවට සහභාගී වීම සදහා ශ්‍රී ලංකා රජයේ ආරාධනය පරිදි බ්‍රිතාන්‍යයේ එලිසබෙත් රැජණගේ කණිටු පුත් එඩ්වඩ් කුමරු මේ වන විට මෙරටට පැමිණ සිටී. නිදහස් සමරුව වෙනුවෙන් ඔහුට ආරාධනා කිරීම පිළිබදව විවිධ වාද විවාද මතුව තිබියදී අපූරු නිවේදනයක් සමාජ ජාලාවල සංසරණය වෙමින් පවතී.
“බ්‍රිතාන්‍ය රාජකීයයන් පිළිගැනීමේ කමිටුව“ නමින් වන එම නිවේදනයෙන්, මෙරටට පැමිණෙන බ්‍රිතාන්‍ය රජ පවුලේ උදවිය ඉදිරියේ ආචාර, සමාචාර, පැවැත්විය යුතු පිලිවෙල මෙරට සියළුම රටවැසියන්ගේ දැනුවත්වීම උදෙසා නිවේදනය කරන්නේ යැයි දැක්වේ.
මෙම නිවේදනයේ සත්‍යතාවය කෙසේ වුවත්, වත්මන් පාලකයන්ගේ හා නිලධාරී පැලැන්තියේ නිවට ක්‍රියාකලාපය අනුව මෙවැනි දේවල්ද සිදුනොවීමටද ඉඩක් නොමැති බවට බොහෝ දෙනෙකු අදහස් පලකර ඇත්තේ “මතක තියාගනිල්ලා, සුද්දන් මේ රට දාල යන්නේ උන්වගේ කලුසුද්දො විසිතිස්දාහක් බෝකරාට පස්සෙයි. ඊට පස්සෙ මේ රට පාලනය කරන්නේ මේ කලු සුද්දො“ යන අනගාරික ධර්මපාලතුමන්ගේ පුරෝකථනයද සිහියට නංවමින්.
