ජනාධිපති මෛත්‍රීපාල සිරිසේන මහතා හා අගමැති රනිල් වික්‍රමසිංහ මහතා ඝාතනය කිරීම හා ආණ්ඩුව පෙරළීමේ කුමන්ත්‍රණයක් මැලේසියාවේ සිට ෆේස්බුක් වෙබ් ගිණුමක් මඟින් සැලසුම් කළැයි කියන පුද්ගලයකු මෙරටට පැමිණීමේදී අත්අඩංගුවට ගැනීමට කොළඹ ප්‍රධාන මහේස්ත්‍රාත් ගිහාන් පිලපිටිය මහතා ඊයේ (19) ආගමන විගමන පාලකවරයාට නියෝග කළේය.
2013 වර්ෂයේ ජූනි මස 13 සැකකරු මෙරටින් බැහැරව මැලේසියාවට ගොස් ඇති අතර එහි සිට ජනාධිපති, අගමැති ඝාතනය කිරීමට සැලසුම් කිරීම, නිත්‍යානුකූල ජනමතයකින් බලයට පත් රාජ්‍ය පෙරළීමට කුමන්ත්‍රණය කිරීම හා රාජ්‍ය විරෝධී වැරැදි සිදුකළ බව පවසමින් රහස් පොලිසිය අධිකරණයට දැක්වූ කරුණු සලකා මහේස්ත්‍රාත්වරයා මේ නියෝගය කළේය.
රහස් පොලිසියේ අධ්‍යක්ෂවරයා විසින් ඉකුත් 6 වන දින ජනාධිපති හා අගමැති ඝාතනය කිරීමට සැලසුමක් ඇති බවට කරන ලද පැමිණිල්ලක් මත රහස් පොලිසියේ පරිගණක අංශයේ ස්ථානාධිපති සේනාරත්න මහතා මෙහි විමර්ශන ආරම්භ කර තිබේ.
මේ සැකකරු විසින් අන්තර්ජාලයේ පවත්වාගෙන යන ෆේස්බුක් වෙබ් අඩවියකින් ඉකුත් 05 වනදා මාතෘකාවකින් තොරව වීඩියෝ දර්ශනයක් ඇතුළත් කර ඇති බවත්, එහි උපැස් යුවළක් පැළඳ සිටින දිගු කොණ්ඩයක් හා රැවුලක් සහිත පුද්ගලයකු රථයක් පදවමින් වීඩියෝ ගතකරන දර්ශනයක් තිබූ බවට රහස් පොලිසිය අධිකරණයට දැන්වීය. එම දර්ශනයේ සිටින පුද්ගලයා විසින් ජනාධිපතිවරයා හා අගමැතිවරයා ඝාතනය කළ යුතු බවත්, බලයට පත්වූ ශ්‍රී ලංකා රජය ඉවත් කළ යුතු බවත්, පෙර සිටි රාජ්‍ය නායකයින් ඝාතනය කළ ආකාරයට දැනට සිටින ඉහළ නායකයින් දෙපළ ඝාතනය කළ යුතු බවට එම දර්ශනයේ සඳහන්ය.
මේ සඳහා එඩිතර රණවිරුවන්ට ඉදිරිපත් වන ලෙසට ආයාචනයක් ද ගිණුම හරහා සිදුකර ඇති බව පැවසූ රහස් පොලිසිය මෙමඟින් ආරක්ෂක අංශ අයුතු ලෙස පොළඹවා ගැනීමක් සිදුව ඇති බවට අධිකරණයට කරුණු දැක්වීය. අදාළ විමර්ශනයේදී සැකකරු පිළිබඳව තොරතුරු අනාවරණය කර ගත් බව පවසන රහස් පොලිසිය අපරාධ නඩු විධාන සංග්‍රහයේ 120, 489 හා 486 වැරදි සිදුකළ බව සඳහන් කළේය. මොහු දැනට විදේශගතව ඇති බැවින් ඔහු මෙරටට පැමිණීමේදී අත්අඩංගුවට ගෙන අපරාධ පරීක්ෂණ දෙපාර්තමේන්තුව වෙත භාර දෙන ලෙසට නියෝගයක් ආගමන විගමන පාලක වෙත නිකුත් කරන ලෙස රහස් පොලිසිය අධිකරණයෙන් ඉල්ලා තිබිණ.
අදාළ කරුණු සලකා බැලූ මහේස්ත්‍රාත්වරයා සැකකරු මෙරටට පැමිණීමේදී අත්අඩංගුවට ගන්නා ලෙසට ආගමන විගමන පාලක වෙත නියෝග නිකුත් කළේය.