කුඩා රාවණාකොටුව ආසන්නයේ දී අනතුරට ලක් වූ සිමෙන්ති ප්‍රවාහන නෞකාවේ වත්මන් තත්ත්වය නාවික හමුදා කිමිදුම්කරුවන් විසින් නිරීක්ෂණය කරමින් සිටින බව නාවික හමුදාව පවසයි.
අද (24)දින උදෑසන කිමිදුම්කරුවන් කණ්ඩායමක් නෞකාවේ තත්ත්වය නිරීක්ෂණය කිරීමේ කටයුතු ආරම්භ කළ අතර මේ දක්වා සිදුකළ සොයා බැලීම්වලදී නෞකාවේ බඳ කොටසට හානි සිදුව ඇති බවට නිරීක්ෂණය වී තිබේ.
කෙසේවෙතත් අනතුරෙන් නෞකාවේ ඉදිරිපස සහ පිටුපස කොටසට හානියක් සිදුව නොමැති අතර ඉන්ධන කාන්දුවක් සිදුවීමේ අවදානමක් ද නොමැති බව නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා මහතා පවසයි.
ලයිබිරියානු ධජය යටතේ එක්සත් අරාබි එමිර් රාජ්‍යයේ අබුඩාබි වරායේ සිට ත්‍රීකුණාමලය දක්වා සිමෙන්ති ප්‍රවාහනය කරමින් තිබු යුරෝසන් නැමති මෙම යත්‍රාව ඊයේ (23)දින පෙරවරුවේ කුඩා රාවණා කොටුව ආශ්‍රිත මුහුදු ප්‍රදේශයේ දී අනතුරට ලක්ව තිබුණි.
බීච් ක්‍රාෆ්ට් ගුවන් යානයක් යොදාගනිමින් ශ්‍රී ලංකා ගුවන් හමුදාව විසින් ද නෞකාවේ තත්ත්වය ගුවනින් නිරික්ෂණය කරමින් සිටින බව ගුවන් හමුදා මූලස්ථානය සඳහන් කළේය.