මුලතිව්, නයාරු, ගුරුකන්ද රජමහා විහාරාධිපති හිමියන්ගේ දේහය විහාර භුමියේ ආදාහනය කිරීම හේතුවෙන් පුජ්‍ය ගලගොඩඅත්තේ ඥානසාර හිමිට සහ මුලතිව් ජේෂ්ඨ පොලිස් අධිකාරිවරයා, පොලිස් ස්ථානාධිපතිවරයා ඇතුළු තිදෙනා අධිකරණයට අපහාස කල බවට චෝදනා කරමින් ද්‍රවිඩ සන්ධානය විසින් ගොනු කල නඩුව අද(16) අභියාචනාධිකරණයේදී නැවත කැඳවනු ලැබීය.
මෙහිදී නඩුවේ චූදිත පාර්ශවය ලෙස නම්කර තිබූ පොලිස් නිලධාරීන් මෙම නඩුවෙන් ඉවත් කිරීමට දෙමල ජාතික සන්ධානයේ පාර්ලිමේන්තු මන්ත්‍රී ජනාධිපති නීතිඥ එම්.කේ සුමන්තිරන් එකඟතාවය පළකර සිටි අතර පුජ්‍ය ගලගොඩඅත්තේ ඥානසාර හිමිට එරෙහිව නඩුව දිගටම රැගෙන යන බව ඔහු අභියාචනාධිකරණයට දැන්වීය.
එම පැමිණිල්ල අද අභියාචනාධිකරණයේ සභාපති විනිසුරු ඒ. එච්. එම්. ඩී. නවාස් සහ සෝභිත රාජකරුණා යන මහත්වරුන් ඉදිරියේ කැඳවනු ලැබීය.
එහිදී සභාපති විනිසුරු නවාස් මහතා විවෘත අධිකරණය ප්‍රකාශ කළේ පෞද්ගලික හේතුවක් මත තමන් මෙම නඩු විභාගයෙන් ඉවත් වන බවය.
ඒ අනුව අදාළ පැමිණිල්ල විභාග කිරීම සඳහා මහින්ද සමයවර්ධන සහ අර්ජුන ඔබේසේකර යන මහත්වරුන්ගෙන් සමන්විත විනිසුරු මඩුල්ල නම් කරන බවයි අභියාචනාධිකරණ සභාපති විනිසුරුවරයා ප්‍රකාශ කළේය.
එම නව විනිසුරු මඩුල්ල ඉදිරියේ පැමිණිල්ල නැවත ඔක්තෝම්බර් මස 20 වනදා කැඳවීමට ද දින නියම වුණි.
පුජ්‍ය ගලගොඩඅත්තේ ඥානසාර හිමි වෙනුවෙන් හිටපු ආණ්ඩුකාර ජනාධිපති නීතිඥ මෛත්‍රී ගුණරත්න මහතා සමග නීතිඥ අශාන් නානායක්කාර සහ නීතිඥ ඉරේෂ් සෙනවිරත්න යන මහත්වරු පෙනී සිටින ලදි.