කොළඹ සිනමන් ග‍්‍රෑන්ඞ් හෝටලයේ ටැප්‍රෝබේන් ආපන ශාලාවේ මරාගෙන මැරෙන බෝම්බයක් පුපුරුවා මනුෂ්‍ය ඝාතන සිදුකළ මොහොමඞ් ඉබ‍්‍රහිම් ඉන්සාබ් අහමඞ් නමැත්තාට ආධාර අනුබල දීමේ චෝදනාව යටතේ සැකපිට අත්අඩංගුවට ගෙන රඳවාගෙන සිටින නීතිඥ හිජාස් හිස්බුල්ලා මහතා බැලීමට පැමිණි ඔහුගේ නීතිඥවරුන් දෙදෙනකු එම සැකකරු ඉදිරිපත් කිරීමට නියමිතව තිබූ හඳුනාගැනීමේ පෙරෙට්ටුව සම්බන්ධයෙන් ඔහු සමඟ සාකච්ඡා කිරීමට අයුතු සහගත උත්සාහයක් දරා ඇතැයි නියෝජ්‍ය සොලිසිටර් ජනරාල් දිලීප පීරිස් මහතා කොටුව මහෙස්ත‍්‍රාත් අධිකරණය හමුවේ පැවැසීය.
පසුගිය 23 වැනිදා සැකකරු බැලීමට ලබාදුන් අවසරය අයුතු ලෙස ප‍්‍රයෝජනයට ගනිමින් දරා ඇති මෙම වෑයම විමර්ශන නිලධාරීන් ක්‍ෂණිකව දැක්වූ විරෝධතාව නිසා වළක්වා ගැනීමට හැකිවී ඇතත් පැමිණිල්ල වෙනුවෙන් තමන් ඒ පිළිබඳව අප‍්‍රසාදය පළ කරන බව නියෝජ්‍ය සොලිසිටර් ජනරාල්වරයා කොටුව මහෙස්ත‍්‍රාත් රංග දිසානායක මහතා හමුවේ කියා සිටියේය.
අපරාධ පරීක්‍ෂණ දෙපාර්තමේන්තුවේ අංක 3 විශේෂ විමර්ශන අංශයේ ස්ථානාධිපති ප‍්‍රධාන පොලිස් පරීක්ෂක රවීන්ද්‍ර විමලසිරි මහතාද, නියෝජ්‍ය සොලිසිටර් ජනරාල්වරයා කළ එම කරුණු දැක්වීම තහවුරු කරමින් පසුගිය 23 වැනිදා සැකකාර හිජාස් හිස්බුල්ලා මහතා බැලීමට පැමිණ පසුදින (24 වැනිදා) පැවැත්වීමට නියමිතව තිබූ හඳුනාගැනීමේ පෙරට්ටුව සම්බන්ධයෙන් සැකකරු සමඟ සාකච්ඡා කිරීමට උත්සාහ දැරූ විත්තියේ නීතිඥවරුන් දෙදෙනාගේ නම් සඳහන් වාර්තාවක් අධිකරණයට ඉදිරිපත් කිරීමට පියවර ගත්තේය.
පසුගිය 19 වැනිදා අධිකරණයෙන් ලබාගත් නොතීසි මෙම පෙරට්ටුව සඳහා කැඳවා තිබූ සිසුන් වෙත භාරදීමෙන් අනතුරුව සිදුකළ ආවේක්ෂණ රාජකාරියේදී ලැබුණු තොරතුරු අනුව හඳුනාගැනීමේ පෙරෙට්ටුවේ සාක්‍ෂිකරුවන් වෙත එක්තරා කණ්ඩායමක් විසින් විශාල වශයෙන් බලපෑම් කර ඇති බව අනාවරණය වී ඇතැයිද විමර්ශන නිලධාරීහු උසාවියට කියා සිටියහ.
සැකකරු හිජාස් හිස්බුල්ලා මහතා සභාපතිවරයා ලෙස කටයුතු කළ ඬේව් ද පර්ල්ස් සොසයිටි නමැති සංවිධානය මගින් පුත්තලම අල් සොනාරියා මද්‍රසා පාසලට යොමුකර තිබූ සිසුන් අතරින් දසදෙනකුම එම සැකකරු එම පාසලට පැමිණ අන් ආගම් හා ආගමිකයන් කෙරෙහි වෛරී සහගත හැඟීම් ඇතිවන ආකාරයෙන් දේශන හා පුහුණුවීම් පැවැත්වූ බවට ප‍්‍රකාශ ලබාදී ඇති අතර අවස්ථා කීපයකදීම එම සිසුන්ට තර්ජන එල්ල වීම නිසා ඔවුන් තම දෙපාර්තමේන්තුවට හා අදාළ පොලිස් ස්ථානවලට පැමිණිලි කළ ඇතැයි අපරාධ පරීක්‍ෂණ දෙපාර්තමේන්තුව එහිදී අධිකරණයට පැවැසීය.