ඇමරිකානු උප ජනාධිපති මයික් පෙන්ස් ගේ කාර්ය මණ්ඩලයේ සාමාජිකයෙකු ඊයේ (08දා ) කොරෝනා වෛරස් ආසාදිතයෙකු බවට පරීක්ෂණවලදී තහවුරු වී ඇතැයි සී එන් එන් ප්‍රවෘත්ති සේවය පවසයි.මේ හේතුවෙන් එම කාර්යමණ්ඩල සාමාජිකයා ඇසුරු කළ බවට සැළකෙන උප ජනාධිපතිවරයාගේ කාර්ය මණ්ඩලයේ සාමාජිකයින් කිහිප දෙනෙකු උප ජනාධිපති පෙන්ස් සමග අයෝවා ප්‍රාන්තයට යාම සඳහා ගුවන් යානයට ඇතුළු වී සිටියදී යානයෙන් බැස්වීමට බළධාරීන් විසින් පියවර ගෙන තිබේ.
මෙම තත්ත්වය මත ඇමරිකානු උප ජනාධිපතිවරයා ගමන් ගත් ගුවන් යානය ගුවන් ගත කිරීම පැයකින් පමණ ප්‍රමාද වී ඇති බව සී එන් එන් සේවය කියයි. කෙසේ වුවද අදාළ කාර්ය මණ්ඩල සාමාජිකයින් ගුවන් යානයෙන් බැස්වීමෙන් පසු පෙන්ස් උප ජනාධිපතිවරයා රැගත් ගුවන් යානය අයෝවා ප්‍රාන්තයේ ඩෙස් මොයින්ස් හි පැවත්වෙන රැස්වීමකට සහභාගී වීම සඳහා පිටත්ව ගොස් තිබේ.
මෙයට පෙර ඇමරිකානු ජනාධිපති ඩොනල්ඩ් ට්‍රම්ප්ගේ පුද්ගලික කාර්ය මණ්ඩලයේ සාමාජිකයෙකුද මෙම සතිය මුළදී කොරෝනා ආසාදිතයෙකු බව පරීක්ෂණවලින් තහවුරු කෙරිණි.