විශ්වාසභංග යෝජනාව ඉදිරිපත් වීමට පෙර එම ධුරයෙන් ඉවත් වන ලෙස අගමැති රනිල් වික්‍රමසිංහ මහතාගෙන් ඉල්ලා සිටීමට ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ (2) රාත්‍රී රැස්වූ එක්සත් ජනතා නිදහස් සන්ධාන පාර්ලිමේන්තු මන්ත්‍රී කණ්ඩායම තීන්දු කර ඇත.
මේ මොහොතේ තිබෙන ගෞරවනීය විසඳුම එය බව ශ්‍රීලනිප මන්ත්‍රී කණ්ඩායමේ අදහස වී ඇත.
එක්සත් ජනතා නිදහස් සන්ධානයේ මන්ත්‍රීවරුන් සියලු දෙනා එක්ව හෙට දිනයේ රැස්වී අගමැතිවරයා මුණ ගැසී මෙම ඉල්ලීම ඉදිරිපත් කිරීමටද නියමිතය.
මෙම ඉල්ලීමට එකග නොවන්නේ නම් විශ්වාසභංගයේදී අගමැතිවරයාට එරෙහිව ඡන්දය භාවිතා කිරීමට සිදුවන බවද දැනුම් දීමට නියමිතය.
මෙම මන්ත්‍රී කණ්ඩායම් රැස්වීම සඳහා සියලු දෙනා සහභාගි වී ඇති අතර ඒකමතිකව මෙම තීන්දුව ගෙන ඇත.