එරාවූර් පුන්කුඩා හි පිහිටි පුංඤාරාම විහාරස්ථානයේ වැඩ වාසය කළ ජර්මන් ජාතික භික්ෂුවක් අභිරහස් ලෙස අපවත් වී ඇති බව පොලීසිය පවසයි.
හික්කඩුවේ පුංඤරතන (අවු:72) නම්වූ මෙම හිමියන් අපවත් වී ඇත්තේ මාරවිල සංචාරක හෝටලයක ලැගුම්ගෙන සිටියදීයි. උන්වහන්සේගේ ගිහි නම Rolf Wermer නම් වන බවද පැවසෙයි.
අපවත්වී ඇති ස්වාමීන් වහන්සේ නිරන්තර මාරවිල ප්‍රදේශයට පැමිණ මෙම සංචාරක හෝටලේ ලැගුම් ගැනීම සිරිතක් කරගෙන සිට ඇත.
පසුගිය 13 වැනිදාද උන්වහන්සේ හෝටලය පැමිණ නවාතැන් ගෙන ඇති අතර 14 වැනිදා දහවල් වන තුරු අවදි නොවීම සම්බන්ධයෙන් සොයා බලන විට කාමරය තුළම මිය ගොස් ඇති බව සේවකයෙකු දැක තිබේ.
පසුව මේ බව මාරවිල පොලීසියට දැනුම්දීමෙන් අනතුරුව පශ්චා මරණ පරීක්ෂණය සදහා දේහය හලාවත මහා රෝහල වෙත රැගෙන ගොස් ඇත. ස්වාමීන්වහන්සේගේ අපවත්වීම සම්බන්ධයෙන් පර්මන් තානාපති කාර්යාලයට දැනුම්දීමටද මාරවිල පොලීසිය කටයුතු කර තිබේ.