උතුරු පළාත් ප්‍රධාන අමාත්‍යවරයාගේ වැය ශීර්ෂය සම්මත කරගැනීමට ගිය අවස්ථාවේදී ඊයේ (21 දා) සවස පළාත් සභා ගර්භය තුළ විශාල ගාලගෝට්ටියක් ඇති වී තිබේ.
මේ ගාලගෝට්ටිය ඇතිවීමට හේතුව වූයේ ප්‍රධාන අමාත්‍යවරයා මුලදී එක් මන්ත්‍රීවරයෙකු වෙණුවෙන් සංවර්ධන කටයුතු සදහා රුපියල් මිලියන දහයක් ලබාදෙන බවට පොරොන්දු වුවත් ඔහු එය අවසානයේදී මිලියන හයකට අඩු කිරීම නිසා බව උතුරු පළාත් සභාවේ එක්සත් ජනතා නිදහස් සන්ධානය නියෝජනය කරණ වන්නිහාමිගේ ජයතිලක මන්ත්‍රීවරයා පැවසීය.
උතුරු පළාත් සභාවේ දෙමළ ජාතික සන්ධානය නියෝජනය කරණ මන්ත්‍රීවරුන් කීපදෙනෙකුද ප්‍රධාන අමාත්‍යවරයාට එරෙහිව අදහස් දක්වමින් ඔහුට සභාව තුළදීම බැණ වැදී ඇත.
ප්‍රධාන අමාත්‍යවරයාගේ ඉතා සමීපතම මන්ත්‍රීවරයෙකුවන එම්.කේ.ශිවාජිලිංගම් මන්ත්‍රීවරයාද ප්‍රධාන අමාත්‍යවරයාට එරෙහිව සභාව තුළ කෑකෝ ගසමින් මන්ත්‍රීවරයෙකුට රුපියල් මිලියන දහයම පොරොන්දු වූ පරිදි අවශ්‍ය බව පවසා ඇත.
යම් හෙයකින් රුපියල් මිලියන 9.99 ක් ලබා දුන්නද එය බාරනොගන්නා බවත් ඊට එරෙහිව පළාත් සභා ගර්භය තුළ උපවාස කරණ බවද මන්ත්‍රීවරයා පවසා තිබේ.
මේ අවස්ථාවේදී ප්‍රධාන අමාත්‍යවරයා පළාත් සභා අරමුදලෙන් තවත් මිලියන දෙකක් ලබාදීමට කැමැත්ත පල කරණ ලද නමුත් මන්ත්‍රීවරු ඊට එකග වී නොමැත.
ප්‍රධාන අමාත්‍යවරයාගේ වැය ශීර්ෂය සම්මත වුවත් ජයතිලක මන්ත්‍රීවරයා ඊට එරෙහිව ඡන්දය ප්‍රකාශ කොට තිබේ.
දිනසේන රතුගමගේ