ආවා කල්ලියේ බව පැවසෙන සාමාජිකයින් 62ක් හඳුනාගෙන ඇති බවත්, ඉන් 38 දෙනෙකු මේවන විට අත්අඩංගුවට ගෙන ඇති බවත්, නීතිය, සාමය හා දක්ෂිණ සංවර්ධන ඇමති සාගල රත්නායක මහතා පාර්ලිමේන්තුවේදී අද (15දා) පැවසීය.
ආවා කණ්ඩායමේ නායකයා ලෙස සැලකෙන කුමරේෂ්වර් විනෝදන් ද මේ වන විට අත්අඩංගුවේ පසුවන බව අමාත්‍යවරයා සදහන් කර සිටියේය.
එම කණ්ඩායම පළමු කඩුව ගෙන්වා ඇත්තේ බ්‍රසීලයෙන් බවත්, එය පළමුව ඉන්දියාවට ගෙනැවිත් එතැන් සිට ශ්‍රී ලංකාවට ගෙනැවිත් ඇති බවත්, එසේම තවත් එවැනි ආයුධ ඔවුන් විසින්‍ හදාගෙන ඇති බවත්. අමාත්‍යවරයා එහිදී කීවේය.
පාර්ලිමේන්තු මන්ත්‍රී අනුර කුමාර දිසානායක මහතා මතු කළ ප්‍රශ්නයකට පිළිතුරු ලෙස හෙතෙම මේ බව කියා අනාවරණය කළේය.
ඒ අනූව අදාළ කල්ලියේ බවට සැක කරන ප්‍රධාන සාමාජිකයින් 8 දෙනෙකු අත්අඩංගුවට ගැනීමට සිටින බවද හෙතෙම පවසා තිබේ.