විහාර දේවාලගම් පනතට සංශෝධන අනවශ්‍ය බවත්, 1931 දී සම්මත කරන ලද ආකාරයටම එය තැබීම සුදුසු බවත් මල්වතු පාර්ශවයේ මහ නායක අති පූජ්‍ය තිබ්බටුවාවේ ශ්‍රී සුමංගල හිමියන් පවසයි.
උන් වහන්සේ මේ අදහස් පල කලේ ඊයේ දිනයේ සංශෝධිත විහාර හා දේවාලගම් පනත සම්බන්ධයෙන් අධිකරණ හා බුද්ධ ශාසන අමාත්‍ය ආචාර්ය විජයදාස රාජපක්ෂ මහතා ඇතුළු පිරිසක් එහිමියන් දැනුවත් කිරීමට මල්වතු මහා විහාරයට ගිය අවස්ථාවේදීයි.
නව පනත් කෙටුම්පතට කිසියම් පාර්ශවයක් විරෝධය පල කරන්නේ නම් පනත පෙර පැවති ආකාරයට තැබීම වඩාත් සුදුසු යයිද උන් වහන්සේ කියා සිටියහ.
ලබන සතියේ පාර්ලිමේන්තුවට ඉදිරිපත් කිරීමට නියමිත සංශෝධිත පනත මගින් සංඝ බේධයකට මුල පිරෙන බවත්, බුද්ධ ශාසනයේ පැවැත්මට අහිතකර දෑ එහි අඩංගු බවත්, කෝට්ටේ පාර්ශවයේ මහ නායක අති පූජ්‍ය ඉත්තෑපානෙ ධම්මාලංකාර හිමියන් විසින් විරෝධය දක්වා තිබිණි.