ඒකාබද්ධ විපක්ෂ පා ගමන මහනුවර නගරයට ඇතුළුවීම නතර කිරීමට හැකිවීම තමන් ලැබූ ජයග්‍රහණයක් බව මහනුවර දිස්ත්‍රික් එජාප පාර්ලිමේන්තු මන්ත්‍රී, උසස් අධ්‍යාපන හා මහා මාර්ග ඇමති ලක්ෂමන් කිරිඇල්ල මහතා පවසයි.
නෙත් ගුවන්විදුලිය සමග අදහස් දක්වමින් ඔහු ප්‍රකාශ කර ඇත්තේ අද මහනුවරදී පැවැත්වීමට නියමිතව තිබූ තම ප්‍රවර්ධන වැඩසටහන පිළිමතලාව නගරය ආශ්‍රිතව සිදු කිරීමට සැළසුම් කර ඇති බවයි.
එවැනි වැඩසටහනක් පවත්වනවනම් පෙරවරුවේ පැවැත්විය යුතු බවත්, පස්වරු 2 න් පසුව පවත්වා ඵලක් නොමැති බවත් ඔහු පවසයි.
මහනුවර නගරයෙන් ආරම්භ කිරීමට නියමිතව තිබූ ඒකාබද්ධ විපක්ෂ පා ගමනට සමගාමීව එක්සත් ජාතික පක්ෂය විසින්ද මහනුවර නගරයේදී ප්‍රවර්ධන වැඩසටහනක් පැවැත්වීමට සැළසුම් කර තිබූ අතර, දෙපාර්ශවය අතර ගැටුමක් ඇතිවේවැයි පොලීසිය විසින් කරුණු දැක්වීමෙන් අනතුරු එම වැඩසටහන් දෙකම අත්හිටුවීමට අධිකරණය නියෝග කර තිබෙනවා. එජාප ප්‍රවර්ධන වැඩසටහන පැවැත්වීමට අවසර දී ඇත්තේ සවස 2න් පසුවයි.
මේ අතර ඒකාබද්ධ විපක්ෂ පා ගමන ගැටඹේ බෝධීන් වහන්සේ අභියසින් ආරම්භ වන බව ඒකාබද්ධ විපක්ෂය පවසනවා.