ගාල්ල – මාකුඹුර අතර ධාවනය කරන අධිවේගී මාර්ග බස් රථවල ගමන් කිරීමට අද (2) දිනයේ සිට පෙරගෙවුම් කාඩ්පත් නිකුත් කරන බව ජාතික ගමනාගමන කොමිසමේ අධ්‍යක්‍ෂ ජනරාල් ආචාර්ය නිලාන් මිරැන්ඩා පවසයි.
කොට්ටාව, මාකුඹුර බහුවිධ ප්‍රවාහන මධ්‍යස්ථානයෙන් මෙම වැඩසටහන ආරම්භ කිරීමට නියමිත අතර අනතුරුව එය දිවයින පුරා භාවිත කළ හැකි පරිදි ව්‍යාප්ත කිරීමට සැලසුම් කර ඇති බව හෙතෙම සදහන් කරයි.
මහජන බැංකුවෙන් සහ ජාතික ඉතිරි කිරීමේ බැංකුවෙන් එම කාඩ්පත් මිල දී ගත හැකි බවත් එම කාඩ් නිකුත් කිරීම සම්බන්ධයෙන් රාජ්‍ය බැංකු සමග ඊයේ (1)දින ගිවිසුම්වලට එළැඹි බවත් ඔහු පවසයි.
රාජ්‍ය බැංකු හරහා මෙම පෙරගෙවුම් කාඩ්පත මහ ජනතාවට ලබා ගැනීමට අවශ්‍ය කටයුතු සැලසුම් කර ඇති බව ද ඔහු පවසයි.
පළමු අදියර ලෙස අධිවේගී මාර්ගවල ධාවනය වන බස් රථ සඳහා මේ ක්‍රමවේදය හඳුන්වා දෙන අතර පසුව දුම්රිය සේවයටත් භාවිත කිරීමට සැලසුම් කර ඇති බව ද ඔහු වැඩිදුරට ත් සදහන් කරයි.