මහනුවර දුම්රිය නිල නිවාසයකට ඇතුළු වීමට උත්සහ කළ පුද්ගලයෙකු තුවාල ලබා රෝහල්ගත කිරීමෙන් පසු මරණයට පත්වීමේ සිද්ධියක් සම්බන්ධයෙන් පරීක්ෂණ පවත්වන පොලිසිය සිද්ධිය සම්බන්ධයෙන් දුම්රිය නියාමකවරු දෙදෙනෙකු සැකපිට අත්අඩංගුවට ගෙන තිබේ.
කඩුගන්නාව ප්‍රදේශයේ පදිංචි මියගිය පුද්ගලයා පසුගිය 13 වන දින දුම්රිය නිල නිවසකට ඇතුළු වීමට උත්සහ කළ අවස්ථාවේ නිවසේ තනිව සිටි තරුණියන් දෙදෙනකු බියට පත්ව කෑගසා ඇත.
එම හඬ ඇසී පැමිණි දුම්රිය නියාමකවරුන් දෙදෙනෙකු කළ පහර දීමකින් අදාළ පුද්ගලයා ඇද වැටී තුවාල ලබා තිබෙන බවට ලද තොරතුරු මත පොලිසිය විසින් සැකපිට නියාමකවරුන් දෙදෙනා අත්අඩංගුවට ගනු ලැබ තිබේ.
ඔවුන් පවසා ඇත්තේ, තමන් මියගිය පුද්ගලයාට පහර නොදුන් බව ත් ඔහු නිල නිවසේ ඉහළ මහලින් ඇදවැටී තුවාල ලැබූ බවත් ය.
සිද්ධිය සම්බන්ධයෙන් මහනුවර පොලිසියේ අපරාධ විමර්ශන අංශය පරීක්ෂණ පවත්වයි.