වැව්, අමුණු මෙන් ම කුඹුරු යායවල් මේ වන විට ජලයෙන් පිරී පැවැතියත් යල කන්නයේ වී වගාව අරඹා තිබෙන්නේ සියයට 45ක වපසරියක් පමණක් බව කෘෂිකර්ම ඇමති මහින්ද අමරවීර මහතා පවසයි.
වී වගාවට අවශ්‍ය පොහොර හිඟයත් වල්නාශක හා කෘමි නාශක, රසායන වෙළෙඳපොළේ නොමැති වීම ත් හේතුවෙන් ගොවීන් යල කන්නයේ වී වගා කිරීම අත්හැර දමා ඇතැයි ද ඇමතිවරයා පෙන්වා දෙයි.
මේ හේතුව නිසා මේ වසරේදී රටේ විශාල හාල් හිඟයක් ඇතිවීමට ඉඩ තිබෙන බව ත් ඒ අනුව මේ වසර තුළ පරිභෝජනය සඳහා හාල් මෙට්‍රික් ටොන් අට ලක්ෂයක් පමණ ආනයනය කිරීමට සිදුවන බව ත් එසේ ආනයන කරන හාල් කිලෝවක් රුපියල් 200කට වැඩි මිලකට අලෙවි කිරීමට සිදුවන බව ත් ඇමතිවරයා පෙන්වා දෙයි.
ජූනි මාසය වන විට රටේ ඇති විය හැකි ආහාර හිඟය නිසා බොහෝ දරුවන් මන්දපෝෂණයෙන් පෙළිය හැකි බව ත් එසේ ම මවුවරුන් ද එවැනි තත්ත්වයකට පත්වීමෙන් අඩු බර දරු උපත් වැඩි විය හැකි බව ත් ඇමතිවරයා ප්‍රකාශ කරයි.