අහිතකර බැක්ටීරියා අඩංගු බවට තහවුරු වූ කාබනික පොහොර අයත් චීන සමාගමෙන් තවත් පොහොර නෞකා 5ක් ඇණවුම් කර ඇති බව ජනතා විමුක්ති පෙරමුණේ හිටපු පාර්ලිමේන්තු මන්ත්‍රී වෛද්‍ය නලින්ද ජයතිස්ස මහතා පවසයි.
ඔහු ප්‍රකාශ කළේ තවදුරටත් මෙරට මුහුදු සීමාවේ නැංගූරම්ලා ඇති චීන සමාගමට අයත් පොහොර නෞකාව යළි හරවා යැවීමට රජය තවමත් අපොහොසත් වී ඇති බවය.
පාදුක්ක ප්‍රදේශයේ දී මාධ්‍ය වෙත අදහස් දක්වමින් නලින්ද ජයතිස්ස මහතා මේ බව ප්‍රකාශ කළේය.
“අපේ මුහුදු සීමාවේ නැවක් කැරකි කැරකි තියෙනවා මාසයක්. එහෙම අපේ මුහුදු සීමාවේ මේක මෙහෙම තියෙන්න බෑ. ඒකේ තියෙන්නේ අහිතකර ක්ෂුද්‍ර ජීවින් සහිත පොහොර නැවක්. ඒ නිසා මේ නැව ආපිට හරවලා යවන්න බෑ. ප්‍රශ්නේ තියෙන්නේ මෙහෙමනේ කුම්බලා මාළු කෑවාම විඳවන්න වෙනවා. ඒ වගේම තමයි ගලේ පැහැරුවාට පස්සේ ඒක වහගන්න කොච්චර ට්‍රයි කළත් බෑ. ආණ්ඩුවට වෙලා තියෙන්නේ මෙහෙමයි චීන පොහොර නැවට ගන්න හිටිය දේවල් අරගෙන තියෙන්නේ දැන් මේක රිවස්කර ගන්න බෑ. ඔය පොහොර නැව නෙමේ තව පොහොර නැව් 5කට ඇණවුම් දාලා තියෙන්නේ. ඔය පොහොර නැව් 5 ගෙනාවට පස්සේ තව අවුරුදු 10ක් 15ක් යනකම් ලංකාවට පොහොර ගෙන්නේ ඔය කියන සමාගම.”