යෝජිත ආණ්ඩුක්‍රම ව්‍යවස්ථා සංශෝධනය මගින් රටේ ඒකීය භාවය හා බුද්ධාගමට හිමි තැන කිසිදු අයුරකින් සංශෝධනයට ශ්‍රීලනිපය ඉඩ නොතබන බව පළාත් සභා හා පළාත් පාලන අමාත්‍ය ෆයිසර් මුස්තාපා පවසයි.
එය ශ්‍රීලනිපයේ ද ස්ථාවරය බවත්, එකී ව්‍යවස්ථා සංශෝධනය ස්ථාවර නියෝගවලට පටහැණි නොවන බවත්, අමාත්‍යවරයා කියයි.
ශ්‍රීලනිප මූලස්ථානයේදී ඊයේ පස්වරුවේ පැවති මාධ්‍ය හමුවකදී හෙතෙම මේ බව කියා සිටියේය.
යෝජිත ව්‍යවස්ථා සංශෝධනය සඳහා ශ්‍රීලනිපයේ යෝජනා 9ක් කථානායකවරයා වෙත බාරදී ඇතැයිද මෙම මාධ්‍ය හමුවට එක්වූ අමාත්‍ය සුසිල් ප්‍රේමජයන්ත මහතා පැවසීය. ඊට නව ආණ්ඩුක්‍රම ව්‍යවස්ථාවක් යන කියමනේ නව යන කොටස ඉවත් කළ යුතු බවද සඳහන් බව ඇමතිවරයා ප්‍රකාශ කළේය.